Leicester City tashmë nuk është befasi. Skuadra e drejtuar nga strategu italian, Claudio Ranieri, ka nënshtruar edhe kampionin aktual të ligës angleze, Chelsea (2-1), për të rimarrë kështu sërish kreun e tabelës.
Thibaut Courtois është portieri i radhës që detyrohet të nxjerrë topin e Jamie Vardy nga rrjeta. Sulmuesi më në formë në ishull, Vardy është bërë i pamshirëshëm ndaj portave rivale, duke “qëlluar” kështu edhe ndaj kampionit në fuqi, Chelsea, pas vetëm gjysmë ore lojë në këtë përballje.
Ndërkohë, në pjesën e dytë të lojës, Riyad Mahrez thellon epërsinë e skuadrës Leicester City, pas një solo depërtimi brenda zonës. Goli i Loic Remy në fundin e ndeshjes për skuadrën londineze, Chelsea, ishte maksimumi që arritën të marrin kampionët në fuqi nga udhëtimi në “King Power Stadium”.
Leicester City udhëheq kampionatin anglez me 35 pikë, e ndjekur nga Arsenal që ka 33 sosh dhe Mancheser City me një më pak. Ndërkohë, skuadra që mban ende kurorën e më të mirit, Chelsea mbetet në vendin e 16-të, me vetëm 15 pikë të mbledhura. /tesheshi.com/
