Nga Blendi Gashi
Ndërsa PDK-ja e Kadri Veselit ende nuk po arrinë të gjejë një zyrtarë për ta rehatuar në postin e ministrit të Integrimeve, LDK-ja e Isa Mustafës po vazhdon emërimet e zyrtarëve të saj në ministri të ndryshme.
Partia e kryeministrit, dje përmes Vlora Dumoshit, shefes së stafit në kabinetin e Mustafës, bëri “lajmin e ditës”, ku tregoi se ka emëruar dy zv.ministra: Rita Hajzeraj-Beqaj, zv.ministre në Ministrin e Integrimeve Evropiane, dhe Safet Kamberin, në pozitën zv. ministër në Ministrinë e Punës dhe e Mirëqenies Sociale.
Sipas njoftimit, ky vendim është marrë ditë më parë nga kryeministri Mustafa. Deri këtu nuk ka asgjë të keqe. Por brenda këtij njoftimi fshehet manipulimi që bëhet. E vërteta qëndron se bëhet fjalë veç për një emërim të ri, jo dy, pasi njëri është veç ndërrim zyre, andaj assesi nuk mund të shiten si riformatime në kabinetin qeverisës.
E vetmja risi, nëse mund të quhet kështu, është rehatimi i Safet Kamberit si zv.ministër, i cili është kryetar i degës së LDK-së në Mitrovicë.
Loja qëndron në atë se Rita Hajzeraj-Beqaj i ka lëshuar pozitën Kamberit në ministri të Punës, pasi ajo deri më tani ka mbajtur postin e zv.ministres.
Dhe për ta rehatuar Kamberin, LDK është kujdesur që Ritës t’ia bëj vendin. Dhe ja ka gjetur! Ku më mirë se në Ministrinë e Integrimeve, apo siç po quhet në opinion edhe si “Ministria jetime”, për faktin se qe pesë muaj ka mbetur pa “zot shtëpie”.
Ndonëse Rita ka shpërndarë në Facebook-un e saj njoftimin e LDK-së për emërimin si zv.ministre e Integrimeve, në profil të saj ende shkruan se ajo është zv. ministre e Punës, ndërsa shumë miq të saj e kanë uruar për pozitën e re, apo thënë më saktë për ndërrimin e zyrës.
Pas këtyre emërimeve nuk është çudi nëse LDK del në opinion dhe thotë se “kemi kryer obligmet tona si partner i koalicionit, pasi kemi mbushur pozitat vakante meqë na takojnë”.
Pavarësisht nëse LDK do tenton t’i paraqet para opinionit si riformatim të ekzekutivit, një gjë farë mirë dihet se zv.ministrat përveç që i harxhojnë para të majme të buxhetit nuk bëjnë ndonjë punë për t’u mbajtur mend, andaj mbeten edhe anonim në opinion.
Më e rrugës do ishte që të matet puna e secilit zv.ministër ashtu si edhe e shefave të tyre, pra ministrave dhe nëse nuk kanë rezultate në punën e tyre t’iu tregohet dersa e jo të shëtisin nga një ministri në tjetrën.
Njëjtë është dashur të ndodh edhe për rastin e fundit. Pra, të tregohen arsyet pse u largua Hajzeraj-Beqaj, nga ministria e Punës, për shkak se dështoi të bëj punën si duhet apo pse i kërkoi shefi i partisë të ndërroi mjedis.
Sipas deklarimit të pasurisë, pagat e zv.ministrave sillen nga 1200 deri në 1800 euro, derisa e rëndojnë buxhetin e shtetit edhe me mëditje, zyrë, telefon, asistentë, këshilltarë politikë, dreka zyrtare, karburante për vetura, etj. /tesheshi.com/
