Nga Blendi Gashi
Legjislatura e kaluar e Kuvendit të Kosovës me shumë të drejtë është cilësuar si më e dobëta në histori të parlamentarizimit. Kjo për shkak se ish-deputetët më shumë kanë treguar “muskujt” se “trurin”, për çka në seancat e gazit ka ardhur edhe deri te përplasja fizike mes tyre dhe sigurimit, por jo vetëm.
Një e metë tjetër e madhe padyshim është edhe fjalori banal i përdorur gjatë seancave nga deputetët, ku më shumë kanë ardhë në shprehje sharjet e fyerjet, ndërsa fare nuk e kanë qarë kokën për hallet e shumta të qytetarëve, për çka është dashur të ngritin zërin pasi kanë marrë paga mbi 2 mijë euro në muaj.
Dhe disa prej tashmë ish-deputetëve të tillë kanë marrë ndëshkimin nga qytetarët më 11 qershor, ku zyrtarë të lartë veçmas të dy partive që qeverisën së fundmi PDK-LDK kanë mbetur jashtë parlamentit, ndërsa janë votuar një numër jo i vogël i kandidatëve të rinj nga të gjitha partitë që shihen si njerëz profesional.
Kjo jep një fije shprese se legjislatura e gjashtë do jetë tejet më e përgjegjshme karshi qytetarëve dhe do të adresojë problemet e tyre dhe se do ketë më pak baltosje mes deputetëve.
Analistët politikë thonë se rezultatet preleminare jo zyrtare tregojnë se Kuvendi i ardhshëm do ketë më shumë në përbërje të saj njerëz të dijes e jo të muskujve.
Politologu Mentor Tahiri, thotë se legjislatura e kaluar, ishte më e dobëta sa i përket strukturës së deputetëve që përfaqësonin aty, andaj edhe qytetarët kanë dëgjuar jo rrallë herë, fjalime jo të denja për foltoren e Kuvendit, e madje edhe fyerje të papërshtatshme për t’u emituar përmes televizionit.
“Bëhet fjalë për ‘politikanë’ tranzitorë në një kohë kur shoqëria kosovare, sikurse edhe ajo shqiptare në përgjithësi, ka mungesë vlerash, si dhe një epërsi të ‘muskujve’ karshi ‘trurit’ gjë që po mundësohet nga një sistem politik-ekonomik i pabarabartë për të gjithë qytetarët. Shumë prej deputetëve të legjislaturës së kaluar, kishin probleme serioze madje edhe për të artikuluar fjalitë në gjuhën shqipe, gjë që shpjegohet me faktin se të tillët nuk kanë përvojën jetësore në lexim”, thotë Tahiri.
Megjithatë ai shpreson se legjislatura e re do jetë tejet më profesionale por edhe më e përgjegjshme.
“Bazuar në listat preliminare që janë publikuar deri tani, shihet se kjo legjislaturë e Kuvendit, është në aspektin kuadrovik më e kompletuar, gjë që vërehet sidomos në listën e mbledhur rreth LDK-së, ku një numër jo i vogël i kuadrove të reja jo vetëm që kanë siguruar mandatin e deputetit, por edhe hyjnë në mesin e më të votuarve. Kjo në njëfarë mënyre do të imponojë një diskurs më serioz në Kuvend, ngase me numrin e madh të votave që kanë marrë, këto kuadro të reja kanë edhe autoritetin legjitim të ngrenë zërin dhe të kundërshtojnë qoftë edhe partitë e tyre. Është më së evidente, është fakti se dallimet në cilësi ndërmjet kuadrove të reja të përgatitura në njërën anë dhe ‘trashëguesve’ të posteve politike në anën tjetër, do të jenë thellë të dallueshme dhe përcaktuese për kulturën politike gjatë viteve të ardhshme”, thotë Tahiri për tesheshi.com.
Edhe analisti politik, Nexhmedin Spahiu, pret ndryshim pozitiv nga legjislatura e re. Ai mendon se deputetët e rinj do ngritin problemet me të cilat përballet shoqëria.
“Ka një ndryshim kualitativ në përbërjen e Parlamentit në të gjithë krahët. Dalëngadalë elektorati po përjashton deputetët koti dhe po i zëvendëson ata me zëra me peshë. Me hapa kërmilli po po ecim përpara në këtë drejtim. Pres që deputetët e rinj të ngritin shqetësimet e qytetarëve, ndërsa përplasjet besoj se më tepër do të bëhen për të tashmën e të ardhmen, jo për të kaluarën”, thotë Spahiu për tesheshi.com.
