Java e sapombyllur mund të konsiderohet e suksesshme për futbollistët legjionarë, pasi disa prej tyre kanë rigjetur rrugën e golit. Bekim Balaj, Ledian Memushaj dhe Milot Rashica kanë vënë firmat e tyre në fitoret që realizuan skuadrat ku ata luajnë.
I pafat ishte kapiteni i kombëtares shqiptare, Lorik Cana, i cili humbi sfidën me ish-skuadrën e tij, Olimpikun e Marsejës. Qendërmbrojtësi luajti 90 minuta të plota me skuadrën e tij, Nantën, por nuk ia doli të ndihmonte në shmangien e humbjes. Miqtë fituan 0-1. Emir Lenjani, futbollisti tjetër i përfaqësueses shqiptare, qëndroi gjatë gjithë lojës në stolin e Nantës, siç ka bërë rëndom këto javë të fundit.
Në Itali, Elseid Hysaj luajti me kohë të plotë në barazimin pa gola që skuadra e tij, Napoli, arriti në transfertë ndaj Xhenovës, ndërsa Etrit Berisha mungoi në humbjen 1-3 të Lacios ndaj Milanit në Romë.
Por është Ledian Memushaj, mesfushori vlonjat, ai që sjell golin nga apeninet. Futbollisti i kuqezinjve e ndihmoi Peskarën të triumfonte bindshëm ndaj Krotones (4-1), duke shënuar dhe duke dhënë pasim për gol. Rrugën drejt rrjetës e gjeti në minutën e 17-të, kur dhe realizoi nga pika e 11-metërshit, ndërkohë që ndihmoi dhe tek goli i tretë i skuadrës.
Tjetër shqiptar që po mahnit me paraqitjet e tij në Europë është sulmuesi i shpresave U21, Milot Rashica. Futbollisti nga Vushtria ka realizuar një tjetër gol në kampionatin holandez, teksa skuadra e tij, Vitese, ka triumfuar në udhëtim ndaj Ekselsiorit, (0-3). Rashica ka mbyllur serinë e golave për skuadrën ku luan, pasi i vuri vulën topit për të shkuar drejt rrjetës në minutën e 54-t.
Në Zvicrën e mbushur me shqiptarë shkëlqeu sulmuesi i ri Albion Avdijaj, i cili arriti të realizonte ndaj skuadrës së Bazelit në humbjen që pësoi skuadra e tij, Vaduzi (1-2). Avdijaj kishte përballë bashkëpatriotin Taulant Xhakaj, që zhvilloi 90 minuta të plotë. Ndërkohë, më vonë atij iu bashkangjit edhe Naser Aliji, i cili shfrytëzoi 30 minutat e fundit për të shijuar fitoren.
Shqiptari tjetër në radhët e Bazelit, Shkëlzen Gashi, ishte sërish jashtë formacionit për këtë ndeshje.
Lucerna e Migjen Bashës dhe e Jahmir Hykës u mposht në udhëtim nga St.Gallen-i (1:0). Basha e startoi ndeshjen nga minuta e parë, ndërsa Hyka u inkuadrua në pjesën e dytë, por që të dy nuk ia dolën që skuadra e tyre të shpëtonte nga humbja.
Bakim Balaj ka realizuar një tjetër gol në kampionatin kroat. Sulmuesi shkodran ka shënuar golin e tretë në triumfin 3-0 që Rijeka arriti në udhëtim ndaj Hajdukut të Splitit.
Fitoren e shijoi edhe pjesëtari tjetër i përfaqësueses shqiptare, Odise Roshi, i cili luajti në pesë minutat e fundit të ndeshjes. /tesheshi.com/
