Ledian Memushaj dhe Milot Rashica ishin protagonistë këtë fundjavë tek skuadrat e tyre, duke qenë figura të rëndësishme në krijimin e epilogut final të ndeshjes. Mesfushori i kombëtares shqiptare ka rigjetur sërish rrugën e rrjetës, pasi ka realizuar golin e parë në triumfin e skuadrës së tij, Pescara në shtëpi ndaj Entellas, (2-0).
Në një marrëdhënie me golin këtë fundjavë ishte edhe Milot Rashica, sulmuesi i Shpresave, që realizoi golin e barazimit për skuadrën e tij Vitesse në udhëtim tek Heracles, (1-1).
Ndërkohë, minutat ishin të paktë për dy sulmuesit e tjerë të kombëtares, Bekim Balajn dhe Sokol Cikalleshin. I pari u paraqit në 20 minutat e fundit në duelin që skuadra e tij e zhvilloi në udhëtim ndaj Slaven Belupon, (1-1). Ndërkohë, pak minuta për Cikalleshin që nuk arriti të shmangë humbjen e skuadrës së tij, Basaksehir në udhëtim tek Fenerbahçe, (1-0).
Për t’u veçuar këtë fundjavë ishte paraqitja e mbrojtësit të kombëtares shqiptare, Elseid Hysaj. Performanca e shkodranit në duelin derbi që Napoli e zhvilloi ndaj Romës (0-0), është vlerësuar lartë nga mediat europiane. Eurosport ka vlerësuar Elseid Hysajn me notën 6.5, pasi përballoi me sukses aksionet e Lagos dhe Salahut në krahun e tij.
Lajme jo shumë të mira vijnë nga Zvicra. Taulant Xhaka ka braktisur fushën e blertë në sfidën që Baseli e zhvilloi në çerekfinalen e kupës ndaj Sionit. Ekzaminimet mjekësore priten të bëhen gjatë ditëve në vijim për të treguar se për çfarë lloj lëndimi bëhet fjalë. Si për ironi të fatit, Basel u mposht pas ekzekutimit të penaltive (6-5), me Albin Ajetin, futbollistin shqiptar që u paraqit në këtë duel nga minuta e 65-të.
Garat e kupës i vazhdon një tjetër futbollist i kombëtares shqiptare. Frederick Veseli me skuadrën e tij, Lugano, që triumfoi në duel me Koeniz, në të cilën skuadër u paraqit edhe futbollisti shqiptar, Alin Osmani, ndërsa Ardit Zenuni e ndoqi ndeshjen nga stoli. /tesheshi.com/
