Golat janë mënyra më e mirë me të cilën sulmuesi i kombëtares shqiptare, Shkëlzen Gashi, mund t’i përgjigjej trajnerit të Basel-it, Urs Fischer-it, i cili nuk e ka për zemër lojtarin, e që në ndeshjen e fundit në kampionat e kishte lënë në tribunë.
Gashi ka realizuar një tregolësh në triumfin që skuadra e tij, Basel-i, arriti në udhëtim ndaj ekipit modest Muttenz (1-5) në kuadër të Kupës së Zvicrës.
Veç Gashit, nuk mungoi të shënonte në këtë sfidë dhe një shqiptar tjetër, Albin Ajeti, i cili realizoi në minutën e 75-të të ndeshjes, që qe njëherësh dhe goli i fundit.
Një tjetër shqiptar që bëri paraqitje të mirë qe dhe mbrojtësi Naser Aliji, edhe ky i lënë në stol gjatë ndeshjeve të fundit.
Ndërkaq, stoli i rezervave për këtë ndeshje iu rezervua Taulant Xhakës, që nuk u paraqit asnjë minutë të vetme në fushë. /tesheshi.com/
