Sulmuesi i kombëtares shqiptare, Sokol Cikalleshi, është protagonisti kryesor pa asnjë dyshim tek skuadra e tij Bashaksherin, duke vazhduar marrëdhënien e tij me golin. Edhe këtë fundjavë sulmuesi 24-vjeçar, gjeti rrugën drejt golit, për t’i dhënë fitoren skuadrës së tij ndaj Bandirmasporin (3-2), në kuadër të Kupës së Turqisë.
Shumë lojtarët të shqiponjave, qëndruan në stol këtë javë, sikurse vetë kapiteni i kombëtares, Lorik Cana, mbrojtësit Arlind Ajeti e Berat Gjimshiti, mesfushori Ergys Kaçe, e sulmuesi Shkëlezen Gashi, që aventura e tij me skuadrën kampione Basel, tashmë mund të quhet e mbyllur.
Mirëpo, ata që zbritën brenda tapetit jeshil, dhanë vlerat e tyre, duke dëshmuar edhe njëherë protagonizmin në skuadrat e tyre. Gardiani i portës kuqezi, Etrit Berisha, ka patur paraqitje fantastike në duelin e fundjavës, të cilën Lazio e fitoi në udhëtim tek Fiorentina, (1-3). Berisha morri notën 5.5 nga mediat italiane, duke pranuar elozhe për disa intervenime fantastike, që i ndihmuan skuadrës romake, të dalë me një tre pikësh, nga një terren që shumë skuadra janë kthyer kokëulur.
Një tjetër futbollist shqiptar që po shkëlqen në kampionatin italian, është mbrojtësi i krahut të djathtë Elseid Hysaj. Shkodrani, 21-vjeçar ka patur një paraqitje fantastike në duel me Frossinonen, të cilën skuadra e tij Napoli e fitoi (1-5), për tu shpallur kampione dimri. Hysaj nuk ka munguar në asnjë ndeshje të skuadrës së tij, duke u zgjedhur si mbrojtësi më i mirë i krahut në pjesën e parë të stinorit.
Ermir Lenjani, është një tjetër futbollist që zbriti në fushë nga minuta e parë këtë javë. Mbrojtësi i krahut të majtë, ka zhvilluar 90 minuta, derisa është veçuar për daljen e tij në zonën e kundërshtarit dhe për krosimet fantastike brenda zonës. Skuadra e tij Nantes, e fitoi duelin përballë, Saint-Etienne (2-1)./tesheshi.com/
