Të afërm të Admir Muratajt, supergrabitësit që mbeti i vrarë nga shkëmbimi i zjarrit me policinë pas rrëmbimit në pistën e Rinasit të afro 10 milion eurove, ishin në morg ku me lot në sy konfirmuan identitetin e tij dhe vuajtën ikjen nga kjo botë të njeriut të tyre me nam të keq.
Ishte aty bashkëshortja dhe i vëllai, në pritje të tërheqjes së trupit, ndërkohë që ky i fundit pranoi të fliste për mediat.
“Lajmin e mora vesh nga mediat, ne nuk njohim asnjë nga shokët e tij, por do i shohim kush janë shokët, ata që e lanë në rrugë. U tha se Admiri ishte organizatori, por organizatori nuk vritet. Tani na intereson të shohim se çfarë ndodhi, tani do e shohim sa organizator është. Ai ka qenë vegël”, tha vëllai i të vrarit, Cen Murataj. Ai shtoi se prej dy vitesh nuk kishte patur asnjë komunikim me të vëllanë.
Me origjinë nga Tropoja, familja Murataj jeton në Prezë, prej aty ku Rinasi, preferenca e Admirit për një sërë grabitjeje të bujshme të viteve të fundit, është si në pëllëmbë të dorës.
CV-ja e tij kriminale e ofron gati si një legjendë grabitjes, ku për një zell të tillë kriminal ishte dënuar dhe në Greqi, nga ku më pas u arratis nga burgu i Trikallas. Me kalimin në territorin shqiptar, vijoi të grabiste me të njëjtin ritëm, sidomos para bankash në situatë transporti. /tesheshi.com/
