Lefter Maliqi, deputeti që ka qenë në Parlament që prej 2005-s dhe që qëndroi 2 mandate njëherë si deputet i LSI-së dhe si i PD-së ka dalë sot në Lapardha në krah të Edi Ramës duke bërë thirrje për të votuar pro PS-së.
“Dua t’i siguroj kryeministrit Edi Rama një fitore të thellë. Të majtë e të djathtë bashkë për të votuar numrin 2, për një fitore të thellë në qarkun e Beratit.
Blendi Klosi është me fat se është i pari. Por me fat është edhe Fadil Nasufi i katërti. Ju e dini që unë doktorët i kam qejf, dhe po ju them i pesti në listën e PS është mjeku i Beratit, Konomi.
Të punojmë fort për të marrë 5 mandate. Rama ka thënë do marrë 71 mandate, por po iu them, 5 mandate i ke në Berat, 71 i ke nga Fieri e tutje, 76 mandate për PS, mos u gënjeni, por bashkohuni për PS” deklaroi Maliqi.
Ndërsa Rama e cilësoi si të paprecedent, faktin që në historinë e pluralizmit një deputet nga lista e PD-së i është bashkuar PS-së.
“I jam mirënjohës Lefterit që me kurajë qytetare dhe me vetëdije politike na u bashkua në këtë betejë. Në 25 qershor pavarësisht bindjes politike dhe çfarë thotë njëri apo tjetri, zgjedhja është qartë, çdo shqiptar është pjesë e trupës së madhe popullore të gjykimit për çdo skuadër, se çfarë ka bërë.
Duhet të bashkohemi të gjithë në një flamur për ta dërguar në BE, votoni PS”, deklaroi Rama.
Lefter Maliqi u largua nga PD-ja, pasi nuk pranoi që të jetë i treti në listën e koalicionit të opozitës së udhëhequr nga Lulzim Basha.
Pas largimit nga PD-ja, Lefter Maliqi lëshoi edhe disa akuza ndaj Bashës për mënyrën e drejtimit të së djathtës.
PS synon të marrë sa më shumë vota që të mos i lejojë LSI-së të bëhet parti e dytë në qarkun e Beratit ku partia e Metës ka përparësi, pasi mban Skraparin ku votohet LSI që prej themelimit dhe kontrollon Beratin prej 2015-s.
LSI synon të dalë forcë e dytë në Berat duke marrë 2-3 deputetë. /tesheshi.com/
