Deputetja socialiste Ledi Shamku, e njohur si dhe si gjuhëtare, i ka bërë “korrigjim hartimi” një parrulle politike të shfaqur në Këshillin Bashkiak të Tiranës, pikërisht nga këshilltari i djathtë Fabian Topollaj.
Ajo ka kapur të gjitha gabimet gjuhësore në ato pak fjali denoncuese ndaj kryetarit Veliaj, duke bërë më pas një kundërdenoncim, atë të shqipes së shkruar në mënyrë të pasaktë.
Ja dhe shënimi (korrigjimi) i deputetes Shamku:
“Pashë këtë foto të këshilltarëve të djathtë bashkiakë dhe afërmendsh më ndali vështrimi te “pankarta” e shkruar.
Vajmedet, në një fjali ka më shumë fjalë gabim se saktë!!!
Të rinj e të shkolluar???!!!
Pa ta shohim!
1. Shkruhet “lerë” me “e” dhe jo “lërë” me “ë”.
2. Lidhëza e kristalizuar “derisa” shkruhet bashkë, dhe jo veç “deri sa”.
3. Shkruhet “radhë” dhe jo “rradhë”.
4. Trajta e shkurtër e bashkuar “t’i” shkruhet me apostrof, pra jo “ti”
Sot kanë rinisur mësimin universitetet. Edhe Fakulteti i Gjuhës Shqipe po ashtu, i cili ofron kurse të përshpejtuara të Shqipes.
Kthehuni në shkollë DERISA të jeni gati për ta shkruar saktë “pankartën” e RADHËS.
Punë të mbarë!”
/tesheshi.com/
