Nga Blendi Gashi
Ka ndërruar jetë ish-kryeministri i parë i Kosovës, Bajram Rexhepi, i cili prej muajsh ndodhej në koma dhe ishte duke qëndruar në njërin prej spitaleve në Turqi pas sulmeve të pësuara në tru.
Ai fillimisht ishte shtrirë në Qendrën Klinike Universitare të Kosovës ku edhe i është nënshtruar operacionit, mirëpo për shkak të gjendjes së rëndë ishte transferuar në Turqi.
Njoftimin për vdekje e ka bërë familje të ndjerit.
Ja një profil i Rexhepit:
Rexhepi me profesion kirurg, ka qenë pjesë e luftës së UÇK-së, ku kaloi tre muaj në male duke shërbyer si mjek në zonën operative të Shalës.
Para kësaj ka punuar si mjek në qytetin e lindjes në Mitroivcë.
Nga paslufta e këndej nuk e ka ushtruar profesionin e tij pasi është pjesë aktive e politikës.
Emri i tij do mbetet përherë në histori në politikën kosovare. Më 4 mars të vitit 2002, pas tre muaj bisedimesh dhe me ndërmjetsimin e kryeadministratorit të atëhershëm të Kosovës Michael Steiner, Kuvendi i Kosovës e zgjodhi Rexhepin si kryeministrin e parë të Kosovës dhe Ibrahim Rugovën si president; të dy konsiderohen si politikanë të moderuar.
Tjetër pozitë e rëndësishme e mbajtur nga Rexhepi është ajo e ministrit të Punëve të Brendshme në qeverinë “Thaçi 1”.
Rexhepi shërbeu si kryetar i këshillit bashkiak të Mitrovicës dhe kryetar i pjesës së jugut të qytetit të ndarë, si dhe kryetar i PDK-së në këtë qytet.
Rexhepi për një kohë ka qenë edhe nënkryetar i PDK-së. Megjithatë në vitet e fundit si rezultat i pakënaqësive për zhvillimet brenda PDK-së, ishte tërhequr krejtësisht nga politika, duke mbetur vetëm anëtar i thjeshtë në PDK.
Rexhepi befasoi të gjithë kur doli haptazi kundër Kadri Veselit dhe bëri akuza të rënda për Shërbimin Informativ të Kosovës (SHIK).
Për Veselin kishte thënë se “është e keqja më e madhe që i ka ndodhur PDK-së”, por që pas disa muajsh megjithatë ndreqi raportet me të. /tesheshi.com/
