Dymbëdhjetë jemenas dhe tre afganë kanë lënë Guantanamon për t’u transferuar në Emiratet e Bashkuara Arabe. Ky është numri më i madh i të burgosurve të transferuar në një herë të vetme gjatë kohës së presidencës së Obama-s.
Me largimin e këtij grupit të burgosurish, numri i të mbyllurve brenda Guantanamos ka zbritur në 61. Shumica e të burgosurve në të janë mbajtur për më shumë se një dekadë pa ndonjë akuzë dhe pa gjyq.
Nëntë jemenas të tjerë do të dërgoheshin në prill në Arabinë Saudite.
Një deklaratë e Pentagonit një ditë më parë thotë: “Shtetet e Bashkuara i janë mirënjohës qeverisë së Emirateve të Bashkuara Arabe për gjestin humanitar dhe gatishmërinë për t’i mbështetur përpjekjet në vijim të SHBA-ve për ta mbyllur kompleksin e ndalimit të Gjirit të Guantanamos.”
Presidenti Obama synon ta mbyllë Guantanamon para se ta lërë përfundimisht detyrën. Ai beson se Guantanamoja krijon sentimente të forta antiamerikane.
Nga Shtëpia e Bardhë është kërkuar që pjesa e mbetur e të burgosurve të transferohet në SHBA, por një lëvizje e tillë është bllokuar nga Kongresi.
Burgu i Guantanamos do t’i hapte dyert në janar të 2002-shit, me iniciativë të presidentit të atëhershëm amerikan, George W. Bush. /tesheshi.com/
