Martin Demichelis, qendërmbrojtësi i shumë skuadrave në Europë, e që po ashtu ka luajtur dhe në 51 takime për përfaqësuesen argjentinase, i ka dhënë dje lamtumirë futbollit të luajtur përmes një konference shtypi ku nuk i ka fshehur dot emocionet.
I rikthyer në muajt e fundit te Malaga, Demichelis do të deklaronte në konferencën e shtypit: “Eshtë ligj i jetës, nuk kam më fuqi në këmbët e mia, nuk kam nivelin e duhur të përqendrimit. Ka ardhur dita e fundit të karrierës sime, e vetëm duhet t’i them faleminderit futbollit.”
River Plejt, Bajern i Mynihut, Malaga, Atletiko e Madridit, Mançester Siti e Espanjoli janë skuadrat me të cilat është aktivizuar 36-vjeçari në karrierën e tij.
“I jam mirënjohës këtij profesioni, por po ashtu Malagës për zgjatjen e karrierës si lojtar dhe për dhënien e vendosmërisë që një lojtar ka nevojë për të vazhduar të jetë profesionist dhe konkurrues.”
“Gjithmonë kam menduar se do të qe një ëndërr ta përfundoja karrierën te Malaga, dhe sot po e bëj këtë.”
Një tjetër 36-vjeçar, një tjetër qendërmbrojtës, gjendet në të njëjtat ujëra, gati për t’i varur këpucët në gozhdë dhe ai.
John Terry luajti mbrëmë për herë të parë që nga shtatori në formacionin kryesor të Çelsit në fitoren 4-3 ndaj Uotfordit.
Kapiteni që e çoi tërë karrierën te Çelsi shënoi madje dhe një gol për kampionët e rinj të Premier League-
s, teksa është në momentet e fundit në këtë skuadër.
Terry nuk e ka përjashtuar tërheqjen nga futbolli me përfundimin e kampionatit, por ka pohuar në të njëjtën kohë se nuk ka marrë ende një vendim.
“Nuk e përjashtoj që të dielën të jetë ndeshja ime e fundit dhe të tërhiqem nga futbolli. Nëse vjen oferta e duhur, do të ulem dhe do ta diskutoj me familjen. Nuk kam marrë ende një vendim, dhe po i vlerësoj të gjitha alternativat,” është pohimi i tij.
Prania e John Terry në formacionin e Çelsit do të zbehej në sezonet e fundit si për shkak të moshës, ashtu dhe prej lëndimeve të njëpasnjëshme. Për të ardhur tani te fundi i kontratës, me tërheqjen përfundimtare në horizont. /tesheshi.com/
