Edhe pse ende janë larg vendimarrjes si pasojë e mosarritjes së një marrëveshjeje me VV-në, krerë të LDK-së u takuan në Berlin me të dërguarin i posaçëm i presidentit amerikan Donald Trump, ambasadori Richard Grenell. Prej tij, treshja Agim Veliu, nënkryetar i LDK-së dhe Avdullah Hoti e Skënder Hysenit, anëtarë të Kryesisë së LDK-së, morrën mesazhin e heqjes së taksës ndaj mallrave serbë, vendosur nga qeveria në ikje, ajo “Haradinaj”.
“Ambasadori Grenell, po ashtu, kërkoi nga delegacioni që të hiqet tarifa ndaj mallrave serbe dhe të përqëndrohet në politikat që thellojnë zhvillimin ekonomik dhe krijojnë vende pune për popullin e Kosovës”, thuhet në një komunikatë të LDK-së.
Delegacioni i LDK-së e njoftoi ambasadorin Grenell për përpjekjet që po bëhen për të arritur një marrëveshje për formimin e qeverisë, sqarohet nga partia e udhëhequr nga Isa Mustafa.
Nga ana tjetër, Vjosa Osmani, ajo që përfaqësoi LDK-në në zgjedhjet e 6 tetorit si kandidate për kryeministër, tha se mosarritja e një marrëveshjeje me VV-në, do ishte një “gabim historik”. /tesheshi.com/
