Ndonëse për vite me radhë kritikuan partitë politike, analistët kosovarë pothuajse të gjithë një nga një po u bashkohen partive të ndryshme, siç thonë, me qëllim që të japin kontribut edhe nga brenda.
Është LDK-ja e Isa Mustafës ajo që më së shumti është përforcuar me analistë.
Pas aderimit dje të analistëve Driton Selmani dhe Dardan Veliaj, sot LDK-së i është bashkuar edhe drejtori ekzekutiv i Riinvestit dhe analisti Lumir Abdixhiku.
Kreu i kësaj partie, Isa Mustafa, në një konferencë, derisa prezantoi anëtarin më të ri të parties, tha se konceptet e Abdixhikut janë të ngjashme me ato të LDK-së për zhvillimin e vendit.
Ndërkaq, Lumir Abdixhiku deklaroi se ndihet i lumtur që tash e tutje do të jetë pjesë e LDK-së, e së bashku me këtë parti i ndan konceptet e njëjta për zhvillimin e vendit.
“Jam i lumtur që kemi gjetur një marrëveshje të tillë, dhe jam i lumtur që jam në LDK. Ftoj të rinjtë dhe të rejat që t’i kthehen LDK-së. Jemi para sfidës për ndarjen e kapjes së shtetit,” ka thënë Abdixhiku. /tesheshi.com/
