Nga Blendi Gashi
LDK-ja e Isa Mustafës ndërsa befasoi jo pak me listën zgjedhore për deputetë ku në plan të parë vendosi të ashtuquajturin “brezi i ri”, duke i dhënë numrat më të mirë rendor, për zgjedhjet lokale të 22 tetorit ka ndjekur një rrugë krejt tjetër.
Besimin e plotë për kandidatë për kryetar komunash ja ka dhënë “gardës së vjetër”, pasi ka kandiduar shumicën e kryetarëve aktuaël edhe për një mandat të dytë.
Ndërsa bie në sy mosvendosja ende lidhur me kandidatin për Prishtinën, pikërisht atë që do ta sfidojë Shpend Ahmetin, kandidat tashmë zyrtar i Vetëvendosjes edhe për një mandat në kryeqytet, si dhe mosdhënia e kandidatit për Prizrenin, qytet të cilin e udhëhoqi shtatë vjet paslufte.
Agim Veliu në Podujevë, Lufti Haziri në Gjilan, Muharrem Sfarqa në Ferizaj, Gazmend Muhaxheri në Pejë, Sokol Haliti në Viti, Burim Berisha në Fushë Kosovë, Imri Ahmeti në Lipjan, Shaip Surdulli në Kamenicë, Sali Asllanaj në Suharekë e Haki Rugova në Isotg të gjithë këta kryetarë aktualë, janë kandidatë të LDK-së me anë të cilëve do të tentojë të rifitojë edhe një mandat në këto komuna.
Padyshim se befasia më e madhe e emrave të lartcekur është rikandidimi i Lutfi Hazirit në Gjilan i cili kohë më parë ka konfirmuar se nuk do t’i hyjë garës. Se çfarë ka bërë që të ndërroi mendje, sigurisht këtë gjë e di vetëm ai dhe Mustafa.
Me përzgjedhjen e kandidaturave të lartcekura është e qartë se Mustafa pret fitore më të sigurt vetëm në këto komuna, por jo në tjerat ku zvarrit emërimin e kandidatëve për kryetarë.
Megjithatë kjo do kuptohet pas 22 tetorit kur do jenë qytetarët ata të cilët do thonë fjalën e tyre se kujt do t’ia besojnë udhëheqjen e komunës.
Frika e Mustafës për kryeqytetin…
Nga kandidimet e zyrtarizuara kutohet qartë se “brezi i ri” i LDK-së ende nuk e ka besimin e plotë të Mustafës. Por për ta vërtetuar këtë gjë testi i vërtetë janë komuna e Prishtinës dhe Prizrenit ku LDK ende nuk ka vendosur për kandidatin.
Lumir Abdixhiku dhe Driton Selmanaj janë dy prej “brezave të rinj” që janë përmendur si kandidatë të mundshëm për kryetar, i pari si rival i Shpend Ahmetit në kryeqytet e i dyti kandidat për Prizrenin.
Kurse si kandidat potencial për këto dy komuna janë edhe “veteranët”, Ismet Beqiri për kryeqytetin e Hatim Baxhaku për Prizrenin.
Kreu i LDK-së, Mustafa beson se do t’i rikthej në qeverisje këto komuna ndërsa ka thënë se javën tjetër, sidomos për kandidatin për Prishtinën, do të vendos Kryesia e LDK-së, siç ka thënë duke pasur parasysh disponimin e kryeqytetasve dhe anëtarësisë së PDK-së.
Por Mustafa me moszbulimin e kandidatit për kryeytetin shpalos frikën e LDK-së për të vendosur për sfiduesin e Shpend Ahmetit i cili në zgjedhjet e fundit e mposhti pikërisht Isa Mustafën.
Mbetet të shihet nëse javën e ardhshme do ta bëjë publikë emrin apo do të vazhdojë ta fshehë atë e që sigurisht më së shumti shkon në disfavor të partisë.
A po e pranon LDK qysh tani disfatën në disa komuna të vogla?
Mustafa nuk bëri publikë as kandidatët për disa komuna më të vogla ku nuk qeveris partia e tij, si në Gjakovë, Klinë, Malishevë, Rahovec, Deçan, Junik, Vushtrri etj., duke pranuar në një mënyrë se nuk beson në marrjen e pushtetit.
Ndërsa bëri të ditur kandidatët për komunat të tjera të ngjashme, si për Shtimen ku LDK do të garon me Selim Shabanin, në Dragash me Selim Kryeziun dhe Bajrush Imerin synon ta rikthej qeverisjen në Novobërdë. /tesheshi.com/
