Kanë kaluar më shumë se dy vjet nga nënshkrimi i marrëveshjes për demarkimin e kufirit ndërmjet Kosovës dhe Malit të Zi. Mirëpo, me këtë ligj nuk pajtohet i nominuari për kryeministër nga PAN, Ramush Haradinaj i cili mbetet prapa qëndrimit se marrëveshja është me plotë gabime. Sipas tij, sapo të formohet qeveria e re marrëveshja duhet të përmirësohet dhe të vendoset një ligj i ri që kufiri me shtetin fqinj të jetë në pikat Kullë dhe Çakorr.
Por nënkryetari i LDK-së, Lutfi Haziri, deklarata të tilla i sheh si debate të kota, pasi Haradinaj s’ka asnjë fuqi që të mund të ndryshojë ligjin e miratuar.
Haziri në një prononcim për Indeksonline thotë “nëse qeveria “Haradinaj” ka fuqi të ndryshojë ligjin për Demarkacionin, ai personalisht do t´i japë dorën dhe do t’i përshëndesë”.
“Këto janë vetëm fjalë të z.Haradinaj, ata duhet që t´a sjellin në Kuvend, pastaj ne e vlerësojmë. Ligji nuk bëhet me deklarata, as me komente. Në momentin që e sjellin draftin në Kuvend, atëherë ne e vlerësojmë. Për momentin është një ligj i miratuar në qeveri dhe ai do të vijë në Kuvend për tu vlerësuar ose jo”, ka thënë Haziri. /tesheshi.com/
