LDK ka hapur fushatën për zgjedhjet vendore të 22 tetorit me një miting, ku kryetari i saj, Isa Mustafa ka thënë se jo vetëm anëtarët e simpatizantët, por të gjithë qytetarët e komunave që kemi drejtuar në këto katër vitet e fundit, janë dëshmitarë se ne qeverisim me duar të pastra dhe në mënyrë transparente.
“Pushteti lokal që do të qeveriset nga Lidhja Demokratike e Kosovës, në secilën prej komunave, do të jetë qeveri lokale e të gjithë qytetarëve, të cilëve do t’u shërbejmë, pa asnjë dallim. Ne e kemi dëshmuar këtë në komunat që kemi qeverisur, prandaj duam t’u japim qeverisje të mirë edhe komunave tjera”, tha Mustafa.
Sipas tij, qeveria e drejtuar nga LDK dëshmoi se ndërpreu praktikat diskriminuese ndaj komunave të caktuara, ka shtrirë mbështetjen e saj në të gjitha komunat e Kosovës dhe këtë e kanë ndjerë qytetarët tanë.
“Jemi krejt ndryshe nga partitë e tjera, jemi një institucion që mishëron traditën dhe aspiratën civilizuese të popullit të Kosovës. Prandaj, jam besimplotë që më 22 tetor, qytetarët e Kosovës, do të demonstrojnë kulturën demokratike dhe veprimin civilizues evropian”, theksoi Mustafa.
Ai ftoi qytetarët që të dalin masivisht në votimet e 22 tetorit për të votuar kandidatët e LDK për kryetarë të komunave dhe për Kuvendet Komunale.
“Lidhja Demokratike e Kosovës dhe unë, do t’i jemi mirënjohës kontributit të secilit individ e institucioni, i cili angazhohet që votimet për pushtetin e ardhshëm lokal të zhvillohen në një atmosferë të qetë, të garës së ndershme dhe demokratike”,theksoi Mustafa. /tesheshi.com/
