Kreu i LDK-së, Isa Mustafa, ka bërë të ditur se sot ka pasur një takim mes të nënkryetarit të kësaj partie, Lutfi Haziri dhe liderit të Vetëvendosjes Albin Kurti, me qëllim që të shihen mundësitë e bashkëpunimit në mes këtyre dy subjekteve politike.
“Do të angazhojmë ekipet tona profesionale, që të shohim nëse mund ta harmonizojmë programin me VV-në, për të parë nëse arrijmë në dakordësim t’i ofrojmë një qeverisje vendit. Mirëpo e gjitha kjo, do të zhvillohet duke respektuar Kushtetutën”, ka deklaruar Mustafa.
Kjo rinisje e bisedimeve mes dy partive vjen pas deklarimit publik të kreut të PDK-së, Kadri Veseli se nëse Albin Kurti bën 60 vota ai personalisht do t’ia japë dhe votën e tij për ta bërë qeverinë. /tesheshi.com/
