Nga Blendi Gashi
Interesante është ajo që ndodh në politikën kosovare: partitë që qeverisin në koalicion mes tyre, kërcënohen rregullisht mes vedi me “zgjedhje të parakohshme”.
Pra, vendi është në dorë të dy forcave politike që jo vetëm nuk udhëhiqen nga një ideal apo vizion i përbashkët qeverisës, ngjashëm si në Gjermani – edhe pse mund të jenë kundërshtarë në disa terma politikë – por që madje i lëshojnë mesazhe kërcënuese njëra-tjetrës për mbetje pa pushtet; kjo nëpërmjet zgjedhjeve të parakohshme.
Të gjithë e dinë se LDK dhe PDK nuk e honepsin njëra-tjetrën, madje dhe BE; e konfirmuar kjo në Progres- Raportin e fundit ku thuhej se “mungon komunikimi ndërmjet ministrave të partive në pushtet”.
Kjo atmosferë e nderë raportesh pati dhe një dëshmi të freskët së fundi: deputetë të LDK-së munguan në fjalimin vjetor të Thaçit si president, ndërsa kolegë të tyre nga PDK munguan në seancën e buxhetit.
Edhe Isa bën të “fortin”…si Kadria
Fjalimin e tij në kuadër të 27-vjetorit të themelimit të LDK-së, kryetari Isa Mustafa e shfrytëzoi dhe për të bërë “të fortin” karshi aleatit, Kadri Veseli. Pasi ky i fundit ka kërcënuar disa herë me “zgjedhje të parakohshme”, edhe Mustafa zgjodhi ta bëjë të njëjtën gjë.
“LDK-ja është e gatshme për zgjedhje në çdo kohë. Lidhja Demokratike respekton mandatin legjitim të fituar nga qytetarët, dhe nuk e zhgënjen këtë besim për asnjë interes. LDK-ja ka treguar gjithmonë se nuk e sakrifikon interesin e qytetarëve, për teket politike të dikujt, e as për interesat e LDK-së”, tha Mustafa, që më pas pohoi me plot gojën se rivali i tyre më i madh mbetet PDK-ja.
Po atëherë pse nuk shkojnë në zgjedhje meqë të dyve u vlon në gjoks kjo dëshirë? Si shqiptarë që janë dhe si shqiptarë që jemi, kjo është e qartë përse. As njëra dhe as tjetra nuk mund të rrijnë dot pa pushtet. Thjesht pa pushtet dhe jo pa qeverisur. Sepse dhe aleanca mes tyre nuk është për të dytën, por për të parën.
Tashmë duhet pritur 2017-ta nëse do të ndodhë ndonjë “Zanzi Bar 2”, pra nëse PDK do të marrë vendim final të dalë nga koalicioni dhe ta çojë vendin në zgjedhje.
Ndërsa LDK vështirë se mund ta bëjë të njëjtën gjë. Frika dhe jo guximi është natyrë e saj(tyre); ashtu siç pushteti dhe jo qeverisja është (a)moraliteti i saj(tyre). /tesheshi.com/
