LDK-ja e Isa Mustafës, edhe pse ka kohë që paralajmëroi një mocion mosbesimi ndaj qeverisë “Haradinaj”, është dorëzuar përfundimisht duke thënë se nuk do të ndodhë një gjë e tillë pa arritjen e një konsensusi mes partive.
Avdullah Hoti, shef i grupit parlamentar të LDK-së në konferencën javore të këtij subjekti, tryezën e mbajtur me partitë e quajti një arritje.
“Tryeza që u mbajt gjatë kësaj jave nga LDK është hera e parë që partitë politike mblidhen me vullnet për t’i hapur temat me rëndësi për Kosovën. Ka qenë një konkluzion i të gjithëve se është e nevojshme të vazhdojë ky dialog. Vendi është në krizë dhe për të dalë nga kjo duhet të bëhet bashkë dialog me të gjitha forcat politike. Besojmë që për dy tri tryeza do të arrijmë një konkluzion”, tha ai.
Hoti tregoi së shpejti partitë politike do të kenë takim me ambasadorët e BE-së dhe të shteteve të Quint-it për situatën e krijuar në vend.
Kujtojmë se partitë politike janë dakorduar që të vazhdojnë takimet mes tyre, por që aktualisht janë larg unitetit pasi opozita kërkon zgjedhje të reja. /tesheshi.com/
