Koalicioni LDK-AKR-Alternativa nesër do të organizojë një tryezë diskutimi në Kuvendin e Kosovës ku temë kyçe do të jetë kriza politike që po pengon formimin e institucioneve, pas zgjedhjeve të 11 qershorit.
Në ftesën që ky koalicion, i ka dërguar mediave, dhe është nënshkruar nga shefi i grupit parlamentar të LAA-së, Avdullah Hoti, thuhet se qëllimi i tryezës është diskutimi dhe propozimi i modaliteteve për gjetjen e zgjidhjes për krizën në të cilën është futur Kuvendi i Kosovës, që nga certifikim i rezultateve zgjedhore të zgjedhjeve të parakohshme.
“Me një vonesë të konsiderueshme, Presidenti i Republikës së Kosovës , në bazë të kompetencave kushtetuese, ka thirrur seancën konstituive të Kuvendit më datë 3 gusht 2017.
Nga ajo datë e deri më tani, janë mbajtur edhe 4 vazhdime të seancës konstituive, në të cilat koalicioni PAN që ka dalë i pari sipas numrit të votave, nuk ka marrë pjesë në seancë.
Duke qenë se sipas vendimit të Gjykatës Kushtetuese të vitit 2014 vetëm ky koalicion ka të drejtë të propozimit të kandidatit për Kryetar të Kuvendit, ka qenë e pamundur të konstituohet ky institucion në mungesë të propozimit që duhet të vijë nga koalicioni PAN”, thuhet në ftesën e LAA-së.
Ndërkaq, bie në sy se dokumenti u është dërguar vetëm deputetëve të koalicionit LAA, të Lëvizjes Vetëvendosje dhe atyre të pakicave, por jo koalicionit PAN.
“Në tryezë janë të ftuar edhe ekspertë të së drejtës kushtetuese nga shoqëria civile dhe nga fusha akademike “, thuhet mes tjerash në ftesën e LAA-së. Takimi i LAA-së do të nisë vetëm një orë pas atij konsultues të thirrur nga kryesuesi i seancës, Adem Mikullovci. /tesheshi.com/
