Skuadra romane ka triumfuar në duelin e parë të kësaj jave në kampionatin italian të futbollit, duke shkatërruar 5-2 Veronën.
Vendasit e Lacios e nisën më mirë duelin e zhvilluar në “Olimpico”, dhe “sefte” e bënë me sulmuesin Alessandro Matri një minutë para mbarimit të pjesës së parë. Me epërsinë minimale të vendasve, skuadrat shkuan në dhomat e zhveshjes, për të ofruar në fraksionin e dytë një festival golash.
Katër të tillë u realizuan nga vendasit dhe dy për ekipin mik. Mauri, Felipe Anderson, Keita dhe penalltia e Candreva-s vulosën fitoren e thellë ndaj Veronës. Për miqtë do të ishin ngushëllues golat e shënuar nga Greco dhe Toni.
Pritshmëritë ishin krejt ndryshe para nisjes së kësaj sfide, duke patur parasysh dhe formën e skuadrave në javët e fundit. Ngjante e mundur një rezistencë më e madhe e Veronës, apo edhe një surprizë prej saj, por Lacio nuk ka lënë vend për mëdyshje.
Kryeqytetasit zhvendosen në vend të shtatë të renditjes tabelare, me 36 pikë, kurse Verona e përkeqëson akoma më tepër pozitën e vet në fund të klasifikimit.
Sonte luhet një tjetër ndeshje në kampionatin italian, ajo mes Karpit dhe Romës. /tesheshi.com/
