Ministri i Jashtëm rus, Sergey Lavrov, ka bërë të njohur në një intervistë për një të përditshme të vendit të tij, Moskovskij Komsomolets, se amerikanëve u është dorëzuar një plan konkret për t’i dhënë fund krizës siriane e se ata po e studiojnë atë.
“Gjatë kontakteve tona me Uashingtonin, ne kemi propozuar një plan absolutisht konkret, të cilin ata po e studiojnë. Shpresoj që propozimet e thjeshta që përmban plani të mos i marrin shumë kohë për shqyrtim Uashingtonit.”
Plani i ri rus nuk e përfshin largimin e Beshar Esadit, ndërsa rusët presin një përgjigje të shpejtë prej amerikanëve për “propozimet e thjeshta dhe specifike”.
Sergey Lavrov dhe John Kerry do të takohen të enjten në Gjermani, dhe pritet që Siria të jetë tema kryesore e bisedimeve mes shefave të diplomacisë ruse dhe amerikane.
Rusia po i mbështet fuqishëm forcat e regjimit sirian me sulme ajrore në ofensivën në Halep, por Lavrov i hodhi poshtë kritikat se kjo ka ndikuar në ndërprerjen e bisedimeve të paqes në Gjenevë një javë më parë. /tesheshi.com/
