Dy ditë pas incidentit me trenin serb që u nis drejt Mitrovicës së veriut, i quajtur ndryshe dhe si “treni rus”, pasi ishte dhuruar nga Rusia, apo “treni i provokomit”, pasi haptazi u nis për të provokuar, ka ardhur një zë nga Moska.
Ka qenë kreu i diplomacisë së Kremlinit, Sergej Lavrov, i cili ka deklaruar se “forcat e shqiptarëve të Kosovës nuk duhet të jenë të pranishëm në veri, atje ku ka popullatë serbe”.
Ky qëndrim i tij u shpreh gjatë një konference vjetore në Ministrinë e Punëve të Jashtme të Rusisë, ku një nga temat ishte edhe acarimi i raporteve në mes Beogradit dhe Prishtinës..
“Shpresoj se të gjithë e kanë kuptuar se ne nuk duhet lejuar shpërthimin e ndonjë konflikti të armatosur në Ballkan”, ka theksuar më tej Lavrov. Por mesazhi i tij ka qenë i qartë: që Prishtina nuk ka punë në veri. Pra, një sinjal i qartë për ndarje të Kosovës që ka mbështetje ruse.
Siç mund të nuhatet, Lavrov i është referuar rastit kur trupat speciale të Kosovës ndërhyn në veri për të ndalur trenin, si dhe paralajmërimit të Prishtinës që me datë 1 ose 17 shkurt, do ndërhyjë për të rrëzuar murin në pjesën veriore të Mitrovicës, pranë Urës së Ibrit. /tesheshi.com/
