Konflikti i armatosur në Ukrainë do të vazhdojë derisa Perëndimi të braktisë planet e tij për të dominuar dhe të çuar në disfatë strategjike Rusinë, tha ministri i Jashtëm rus Sergei Lavrov në një intervistë në gazetën indoneziane Kompas.
Qëllimi i “Perëndimit kolektiv të udhëhequr nga SHBA” është të forcojë hegjemoninë e tij globale, tha zoti Lavrov, i cili foli për gazetën përpara pjesëmarrjes së tij në Samitin e Azisë Lindore dhe samitin e Shoqatës së Kombeve të Azisë Juglindore (ASEAN) në Xhakarta brenda javës, ku do të marrë pjesë edhe homologu i tij amerikan Anthony Blinken.
“Pse konflikti i armatosur në Ukrainë nuk po merr fund? Përgjigja është shumë e thjeshtë – do të vazhdojë derisa Perëndimi të braktisë planet e tij për diktuar fuqinë e tij dhe të kapërcejë dëshirën e tij obsesive për të shtyrë në disfatë strategjike Rusinë duke përdorur kukullat e saj në Ukrainë”, tha kreu i diplomacisë ruse. “Për momentin, nuk ka asnjë indikacion” se kjo do të ndodhë, shtoi ai.
Lavrov qortoi gjithashtu Kievin për injorimin e një plani paqeje të propozuar nga Indonezia dhe në vend të kësaj për promovimin e “paketës së tij të ultimatumeve”.
Plani i paraqitur nga Xhakarta përmbante disa propozime, duke përfshirë, ndër të tjera, krijimin e një zone të çmilitarizuar. Qeveria ukrainase e hodhi poshtë këtë, duke iu përmbajtur kërkesës së saj të kahershme që Rusia të tërheqë trupat e saj nga i gjithë territori ukrainas. /tesheshi.com/
