Pas një serie të gjatë përpjekjesh ka patur dje më në fund në Beograd një takim mes ministrit të Jashtëm rus, Sergei Lavrov, dhe mbajtësit të së njëjtit post në qeverinë turke, Mevlyt Çavushogllu. Ashtu siç edhe pritej, takimi nuk ka përfunduar me diçka të qenësishme, por thjesht ka shërbyer si një mundësi për shkëmbimin e drejtpërdrejtë të opinioneve të palëve mbi incidentin e rrëzimit të avionit rus.
Lavrov është shprehur shumë ftohtë për takimin në një konferencë shtypi. “Jemi takuar me drejtuesin e Ministrisë së Jashtme turke pas kërkesës së tij ngulmuese. Sidoqoftë, nuk kemi dëgjuar asgjë të re prej tij.” Ministri i jashtëm rus ka ruajtur kështu qëndrimin e ashpër të vendit të tij në lidhje me rrëzimin e avionit.
Në ndryshim me të, Çavushogllu ka qenë më entuziast pas takimit, duke theksuar se është e rëndësishme të mbahen të hapura kanalet e komunikimit.
“Kemi ofruar ngushëllimet tona për pilotin rus. U jemi përgjigjur gjithashtu pretendimeve ruse në lidhje me tregtinë tonë të naftës.”
“Shpresojmë që ata t’u japin fund pretendimeve të pabaza,” është shprehur ministri i Jashtëm turk për sa ka të bëjë me deklarimet e autoriteteve ruse se Turqia bën tregti nafte me ISIS-in.
Çavushogllu ka kujtuar po ashtu pas takimit se do të qe jorealiste të mendohej se problemet mes Turqisë dhe Rusisë do të zgjidheshin me një takim të vetëm.
Ky ishte i pari takim i drejtpërdrejtë me zyrtarëve të lartë të të dy vendeve pas rrëzimit të avionit rus. Gjatë kësaj kohe kanë mbizotëruar akuzat e kundërakuzat, të shoqëruara me kërcënimet e Putinit dhe me një përpjekje të dukshme të autoriteteve turke për t’i ulur tensionet. /tesheshi.com/
