Viti 2022, i cili po i afrohet fundit, i ka zbuluar Rusisë se me cilat vende dhe aktorë mund të “negociohen” dhe me cilët “nuk mund të besohet”, tha ministri i Jashtëm i Federatës Ruse, Sergej Lavrov.
“Situata është sqaruar përfundimisht dhe në mënyrë të pakthyeshme… me kë mund të negociohet dhe kujt nuk mund t’i besohet tani e tutje,” tha ai në një intervistë për televizionin Rossiya-1.
Kreu i diplomacisë ruse shtoi se viti i kaluar ndihmoi për të qartësuar “synimet dhe planet” e vendeve në skenën ndërkombëtare.
Rusia është goditur nga valë të njëpasnjëshme sanksionesh ndërkombëtare që nga fillimi i luftës në Ukrainë në fillim të këtij viti, të cilat përfshijnë kufizime të udhëtimit dhe tregtisë, ngrirje të aseteve dhe kufizime të çmimeve në eksportet ruse të naftës.
Më 1 dhjetor, presidenti i SHBA Joe Biden tha se ishte gati të bisedonte me homologun e tij rus Vladimir Putin nëse kishte një interes të vërtetë për t’i dhënë fund konfliktit.
Megjithatë, Rusia ka hedhur poshtë kërkesat që ajo të tërhiqet plotësisht nga Ukraina si pjesë e çdo negociate të ardhshme për t’i dhënë fund “operacionit të saj special ushtarak” në vendin fqinj. /tesheshi.com/
