Sonny Melton, infermieri 29-vjeçar nga Tennessee, vdiq duke mbrojtur të shoqen në masakrën e Las Vegasit.
Rachael Parker ishte punonjëse policie jashtë shërbimit, që po shijonte koncertin bashkë me disa kolege.
Angela Gomez ishte gjithmonë e qeshur, vazhdonte studimet e larta dhe adhuronte skenën.
Me shuarjen e Sandra Casey humbet një mësuese e shkëlqyer.
Jenny Parks u qëllua bashkë me të shoqin. Ajo vdiq në vend, ndërsa ai po i nënshtrohet ndërhyrjeve kirurgjikale.
Viktimat e Las Vegasit e kanë një fytyrë dhe një histori. Shumica e të identifikuarve deri tani janë të rinj, viktima të marrëzisë së një njeriu, të cilin nuk e kanë njohur kurrë.
Mes lotësh, njerëzit kanë ndezur qirinj për këtë humbje të pakuptimtë jetësh, ndërsa të mbijetuarit rrëfejnë momentet e tmerrit. Pjesa dërrmuese, në fillim nuk e kuptoi fare se çfarë po ndodhte.
“Kur filluan të shtënat mendova se ishin fishekzjarre. Pastaj pashë njerëzit të hidheshin në tokë e më kapi frika. Ishte e tmerrshme. Nuk e dinim nga qëllohej, menduam se mos ishte dikush në mesin e turmës. Mendojeni vetë: je i rrethuar nga mijëra njerëz e nuk e di se kush po shtin mbi ty. Ishte e frikshme”, tha Tom Mcintosh.
Lajmi se agresorit iu gjetën mbi 40 armë, shumica të blera në mënyrë të rregullt, rindezi debatin e kontrollit mbi armët e zjarrit në Shtetet e Bashkuara. Demokratët kërkojnë ligje të forta, ndërsa republikanët heshtin.
Steven Paddock, gjatë një festivali të muzikës kauntri, vrau 59 njerëz dhe plagosi mbi 500 të tjerë. /tesheshi.com/
