Tashmë nis loja e madhe e rrokadës në dy institucionet më të rëndësishme të shtetit: kreun e Shërbimit Sekret dhe Prokurorinë e Përgjithshme. Edi Rama ka takuar Presidentin e Republikës, Ilir Meta, për të nisur një proces të shpejtë konsultimesh për dy nga emërimet më të rëndësishme të vendit.
Vetë Visho Ajazi, drejtori aktual i SHISH-it ka dhënë dorëheqjen për t’i hapur paqësisht rrugën një procesi që duket po përfundon pa ndonjë traumë, siç ka ndodhur në vitin 2002, kur u desh të ndryshojë Presidenti i Republikës që të largohej Fatos Klosi i cili nuk kishte marrëdhënie të mira me Kryeministrin e atëhershëm Fatos Nano, dhe në 2012 kur u desh të zgjidhej President Bujar Nishani që të largonte kryespiunin Bahri Shaqiri, i cili nuk pëlqehej nga Kryeministri i atëhershëm, Sali Berisha.
Burime diplomatike i thanë tesheshi.com se qeverisë shqiptare i është kërkuar nga NATO që shërbimi sekret shqiptar duhet të rrisë kapacitetet e tij, në kuadër të kulmit të luftës që po zhvillohet në Ballkan prej Rusisë për të ruajtur hegjemoninë, si dhe për të çarë poret e Sigurisë Kombëtare në këto vende.
Deri tani nuk dihet kush do të jetë kandidatura që do të zëvendësojë Visho Ajazin, megjithëse ka zëra që Edi Rama preferon një grua në krye të Shërbimit Sekret, përkatësisht eksperten që deri tani është si Kryeinspektore e qeverisë në SHISH.
Ndërkaq, nga ana e tij, Ilir Meta ka ofruar si këshilltar në Presidencë, ish-kreun e shërbimit sekret, Bahri Shaqiri, i cili natyrisht që e ka furnizuar kreun e shtetit me të dhënat dhe humoret e një institucioni që është shumë i rëndësishëm në vend.
Ikja e Visho Ajazit do ta heqë aksesin e Sali Berishës me informacionet e klasifikuara që vijnë nga selia pranë Spitalit Psikiatrik, por nga ana tjetër Edi Rama edhe pse ka të drejtën e propozimit, do të duhet të “kënaqë” Ilir Metën, në mënyrë që kandidatura të jetë brenda preferencave të Presidentit.
Kreu i shtetit, në kulmin e një përplasjeje me Ramën në fushatën elektorale të 25 qershorit, deklaroi se nuk do të jetë “noter” i kryeministrit pasi nuk do të dekretojë kandidatura që atij i duken të papërshtatshme.
Megjithatë, realisht të gjitha palët nuk se kanë liri veprimi në lidhje me Shërbimin Informativ Shtetëror.
Institucioni shqiptar i zbulimit, prej vitit 1992 ka shërbyer kryesisht si një “strukturë e gatshme” e shërbimit sekret amerikan-CIA, e cila ka një bashkëpunim shumë të ngushts me SHISH, bashkëpunim që në publik është keqpërdorur nga krerët shqiptarë të shërbimit për të fituar kredite politike.
Që do të thotë se ai që do të zgjidhet si drejtor i ri i SHISH, duhet të jetë një person i kaluar në “vettingun” e amerikanëve dhe jo thjesht një kandaturë që u pëlqen palëve.
E sigurtë është se kryespiuni shqiptar do të duhet të jetë i “qëruar” dhe i paprekur nga çdo influencë e rusëve, të cilët sidomos vitet e fundit, kanë arritur edhe në elementë shqiptarë të Sigurisë Kombëtare, duke përkrahur dhe mbështetur ekspertë të sigurisë që mund të hynin lirshëm si kandidatura zyrtare për agjencitë e zbulimit dhe kundërzbulimit.
Madje, siç mësohet, një person mjaft i njohur i këtyre ambienteve u propozua para disa vitesh edhe si drejtues i një agjencie zbulimi nga një ish-bashkëpunëtor i Ramës, por kryeministri e refuzoi menjëherë, pasi kishte informacione për lidhje me rusët.
Dhe menjëherë pas këtij, eksperti në fjalë nisi luftën publike ndaj ambasadorit amerikan në Tiranë, Donald Lu dhe atyre që e cilësonte si “grupim i Sorosit”.
Por tani duket se ky ambient është edhe më i qartë pasi administrata amerikane e Presidentit Donald Trump është pozicionuar fort për të luftuar influencën ruse në rajon, dhe në Shqipëri është një bërthamë e rëndësishme e kësaj aleance.
Në kryeqytetin e Maqedonisë, Shkup, pas trazirave të prillit të shkuar është ngritur një shtab i rëndësishëm i agjencive inteligjente të SHBA dhe NATO-s, pikërisht për ta luftuar nga afër përpjekjen ruse në Ballkan.
Ndërkaq, pas mbylljes së çështjes së Kreut të Shërbimit Sekret, pritet të hapet edhe gara për zëvendësimin e Adriatik Llallës në postin e Kryeprokurorit.
Por kjo i përket një faze tjetër dhe që Edi Rama do ta ketë shumë më të vështirë, jo thjesht me Presidentin Ilir Meta, por edhe me kreun e opozitës Lulzim Basha.
Sot Kryeministri hyri në Presidencë më i lehtësuar, pasi e dinte që gjysmën e punës e kanë kryer amerikanët, që me dorëheqjen e Visho Ajazit. Faza e dytë do të jetë shumë më e vështirë. Por duhet pritur vettingu që nisi punën pikërisht sot. /tesheshi.com/
