Pesë muaj e gjysmë pasi forcat ruse nisën fushatën bombarduese në Siri në mbështetje të Beshar Esadit, sot ka nisur largimi i avionëve luftarakë drejt bazave në Rusi.
Grupi i parë i avionëve e ka lënë tashmë bazën ajrore të Latakias. Këtë e bën të ditur Ministria ruse e Mbrojtjes përmes një njoftimi të saj.
“Grupi i parë i avionëve rusë e ka lënë bazën e Humejmimit dhe ka fluturuar drejt bazave respektive në Rusi. Formacioni udhëhiqet nga një avion Tu-154 dhe përfshin bombarduesit SU-34.”
Vendimi i papritur për tërheqjen e trupave u dha dje nga presidenti rus. Në të njëjtën kohë, Putin lajmëroi se do të mbajë në Siri një numër të kufizuar trupash, çka do të thotë se nuk do të jetë një tërheqje e plotë.
Numri i ushtarëve rusë në Siri nuk është mësuar asnjëherë, por SHBA-të sugjerojnë se sillet nga 3.000 gjer në 6.000 personel ushtarak në terren.
Ndërsa tërheqja shihet si ndihmëse për bisedimet e paqes që rinisën dje në Gjenevë, senatori amerikan John McCain e vlerëson ndryshe aktin rus.
“Njoftimi se Rusia do të fillojë tërheqjen e disa forcave ushtarake nga Siria sinjalizon besimin e Vladimir Putin-it se ka bombarduar dhe vrarë aq sa duhet nga kundërshtarët e regjimit vrasës të Esadit sa të garantojë mbijetesën e tij,” ka thënë senatori në një deklaratë për shtyp. /tesheshi.com/
