Opozita ka reaguar lidhur me vendimin e kompanisë “OMNIX Albania”, pas rrahjes barbare që iu bë kreu të saj, Fadi Mitri ditë më parë në Tiranë. Kryetari i PD-së, Lulzim Basha tha se ky është një tjetër lajm i keq për vendin.
“Edi Rama hesht, sepse Shqipëria i duhet e varfër dhe e papunë, pasi e ka më të lehtë ta sundojë me banda e trafikantë. Largimi i Omnix është tjetër lajm i keq për vendin tonë. Lajm i keq për shqiptarët dhe kompanitë e huaja që largohen nga viti në vit. Krimi, trafikantët dhe banditët ia dolën ta mbajnë të tyre zhvillimin dhe Shqipërinë. Shqipëria e varfër, me drogë janë e vetmja mundësi që Rama të qëndrojë në pushtet. Edi Rama ka dëshmuar se jep siguri dhe garanci vetëm për krimin dhe bandat, por jo për investitorët vendas apo të huaj”, deklaroi Basha në një deklaratë për shtyp.
Omnix Albania, kompania që do të investonte 450 milionë euro në Lalëz, deklaroi tërheqjen e menjëhershme nga të gjitha investimet në Shqipëri. Vendimi erdhi dhjetë ditë pasi presidenti i kësaj kompanie u dhunua fizikisht nga persona, të cilët i kërkuan të largohej nga Shqipëria. Shqipëria nuk mund dhe nuk duhet të jetë peng i Edi Ramës dhe kartelit të tij kriminal”, e mbylli Basha deklaratën e tij.
Dhe vërtet, deri më tani nuk ka asnjë reagim qeveritar për këtë ngjarje me mjaft pasoja për imazhin e Shqipërisë në sy të investitorëve të huaj. E nga ana tjetër, nga investigimet e ndryshme mësohet se as në qeverisjen e PD-së, investitori libanez nuk ishte ndjerë shumë i lumtur. Për gati 5 vite me rradhë, qeveria Berisha e kishet privuar nga leja për të ndërtuar. /tesheshi.com/
