Ka lënë shumë përshtypje tek qarqet diplomatike në Tiranë deklarata e djeshme e ish-kryeministrit Berisha në sy të ambasadorit amerikan në Tiranë, Donald Lu.
Në mënyrë të prerë dhe pa ekuivok, lideri historik i demokratëve shqiptarë ka bërë të ditur se vendimi i tij për lënien e mandatit të deputetit është drejt konkretizimit.
Vetë Berisha këtë mundësi e ka afruar edhe në një postim në faqen e tij në Facebook, ku njofton mbi takimin me ambasadorin amerikan.
“Në takim u diskutua mbi zhvillimet në Parlament. U shpreha se, nëse disa muaj më parë pata shprehur mundësinë e dorëzimit të mandatit, kjo ishte një mundësi hipotetike, por në kushtet e krijuara, me sjelljen nga Rama të Prengës në Parlament, e gjej shumë të vështirë pranimin e një parlamenti të tillë, të përgjakur”, shkruan ish-presidenti dhe shefi i qeverisë shqiptare për disa vite.
Ndërkaq, në qarqet perëndimore po diskutohet si pjesë e zhvillimeve me situatën aktuale jo vetëm në Shqipëri por në të gjitha trevat shqiptare dhe në rajon.
Një burim diplomatik i tha tesheshi.com se kjo lëvizje është mjaft e ngjashme me atë që ndodhi në Kosovë me kryetarin e Aleancës për Ardhmërinë e Kosovës, Ramush Haradinaj.
Një prej krerëve të opozitës së Kosovës, dorëzoi mandatin e deputetit duke e zhvendosur luftën e tij në tribunën e AAK-së.
Por gjithçka ka ardhur pas një konsultimi të gjatë me faktorin ndërkombëtar, duke e lidhur të gjithë këtë edhe me pasojat që do të sjellë instalimi i Gjykatës Speciale.
Pra, edhe nëse nuk kemi të bëjmë me një largim definitiv nga jeta politike institucionale, bëhet fjalë se jemi përballë një mënjanimi i përkohshëm, por që sipas të gjitha gjasave do të zgjasë shumë.
Dhe në këtë prizëm mund të shihet edhe qëndrimi i ish-kryeministrit Sali Berisha. Ai me lënien e mandatit pritet të jetë më aktiv në opozitarizmin e Partisë Demokratike, por jo në tribunën e Kuvendit, ku të enjteve “Doktori” është protagonist numër një.
Në mars pritet të miratohet e ashtuquajtura reformë në drejtësi që si thelb ka ndryshimin e prokurorëve dhe gjyqtarëve në mënyrë që të nisin arrestimet e politikanëve të korruptuar.
Një mënjanim i Berishës nga Kuvendi ka shumë gjasa ta bëjë më të fortë opozitarizmin e tij por edhe të Partisë Demokratike, megjithëse pjesa zyrtare e PD-së të votojë reformën në drejtësi.
Por gjithsesi duke u nisur edhe nga përvoja e gjatë dhe mosha, nëse Doktori do të japë dorëheqjen si deputet, një rikthim i tij i mundshëm në jetën institucionale bëhet edhe më i zbehtë…
Y.Pata – /tesheshi.com/
