Mensur Krasniqi
Pas lajmit të djeshëm se partia shqiptare në pushtet në Maqedoni, BDI ka marrë vendim të befasueshëm për tërheqjen e gjithë përfaqësuesve të vet aktual nga pushteti ekzekutiv i Republikës së Maqedonisë, ministrat e BDI-së kanë konfirmuar këtë, edhe atë duke dorëzuar dorëheqjet e tyre deri tek kryeministri Emill Dimitriev.
Këtë e ka bërë të ditur edhe ministri i Arsimit, Abdilaqim Ademi, i cili vendimin për dorëheqjen e tij e ka publikuar në rrjetin social facebook.
“Në bazë të vendimit të kryesisë së Këshillit të përgjithshëm të BDI-së jap dorëheqje të parevokueshme nga pozicioni i Ministrit për Arsim dhe Shkencë në Qeverinë e Republikës së Maqedonisë”.
Ky veprim i çuditshëm politik i BDI-së për dalje nga nga kolaicioni qeverisës në Maqedoni sipas burimeve jozyrtare është marrë nga kryesia e kësaj partie pas një mbledhjeje të jashtëzakonshme, zhvilluar pas skandalit të një audio-përgjimi mes deputetes Ermira Mehmeti dhe zv/kryeministrit Musa Xhaferi, dy eksponentë të kësaj partie, të cilëve iu publikua një bisedë me nota erotike.
Vendimi për dorëheqje të BDI-së nga Qeveria ka hasur në reagime të shumta si nga parti politike ashtu edhe nga analistë politikë.
Sipas Lëvizjes Besa, me daljen nga Qeveria, BDI i’a bëri shërbimin e fundit VMRO-së, meqë shefi i tyre Gruevski kishte paralajmëruar më parë se Ali Ahmeti ia ka dhënë fjalën se do ta mbështesë që zgjedhjet të jenë më 5 qershor, ndonëse Ahmeti thonë ata “nuk është dëshmuar si mbajtës i premtimeve para shqiptarëve, kësaj radhe ai ia mbajti fjalën mikut të tij Gruevski”.
“Me vendimin e mbrëmshëm të BDI-së, që ajo të tërhiqet nga Qeveria, kjo parti edhe një herë dëshmoi se në kohën kur në Maqedoni po thyhen shtizat ndërmjet agjendës amerikane për dekriminalizimin e politikës dhe për rikthimin e saj në rrugën e integrimeve euro-atlantike, kjo parti përsëri doli në mbrojtje të politikave antimaerikane.
Akoma pa u pastruar lista zgjedhore, pa përfunduar reformat shumë të nevojshme në media dhe pikërisht kur filloi të veprojë Prokuroria Speciale, kjo parti po e braktis qeverisë, që kështu t’ia bëjë shërbimin e fundit VMRO-DPMNE-së dhe t’i mundësojë asaj të shpëtojë çka të mundet dhe t’i shpëtojë zyrtarët e saj që tashmë janë të vdekur politikisht.”, thonë nga Lëvizja BESA.
Ndërsa sipas opinionistes së njohur shqiptare, Adelina Marku tërheqja e BDI-së nga koalicioni me VMRO-DPMNE-në nuk është vendim por kalkulim që të shkohet me çdo kusht në zgjedhje të parakohëshme.
Ja postimi i plotë i saj në facebook:
“Integristët u tërhoqën më në fund! ose më mirë…s’kishte mënyrë tjetër se si deri tek zgjedhjet e parakohëshme!si lopa b_glen, …e vendosën këtë hap! nuk është VENDIM, është kalkulim! …qofsha e gabuar!”, shkruan Marku.
Poashtu është për tu çuditur se as partia maqedonase në pushtet, VMRO-DPMNE e drejtuar nga ish kryeministri Nikolla Gruevski, nuk ka dashur tepër të komentojnë vendimin e djeshëm të partisë së Ahmetit, por kanë deklaruar shkurtë se BDI duhet të tregojë se vallë a kanë ndonjë “skenarë të kontraktuar” ose jo.
Zëdhënësi i VMRO-DPMNE-së, Ivo Kotevski, thotë se ndoshta gjatë ditës VMRO-DPMNE-ja do të del me qëndrim në lidhje me tërheqjen e BDI-së nga qeveria aktuale.
“Nëse ka nevojë do të prononcohemi në lidhje me vendimit gjatë ditës së sotme”, ka deklaruar shkurtë Kotevski.
/tesheshi.com/
