Kryebashkiaku i Kukësit Safet Gjici ka dhënë dorëheqje, pas është shfaqur në një video të sikletshme, në zyrën e tij, në një marrëdhënie erotike.
Ai nuk e ka kundërshtuar atë që ka parë gjindja, por thotë se është një kurth ndaj tij.
“Ndjesë të thellë publike çdokujt që sot ka parë atë material të shëmtuar video”, nis mesazhi i dorëheqjes së tij, ku në këtë rast nuk është e qartë se çfarë është e shëmtuar për të: akti i tij apo i atyre që i kënë bërë kurthin.
“Pas një fushate dhe përballjeje jo të lehtë me kundërshtarët e mi, pas të cilës rezultova fitues, fatkeqësisht unë rash pre e një kurthi të përgatitur me detaje nga e njëjta dorë njerëzish me të cilët u përballa në zgjedhje. Ja arritën ta bëjnë në një formë tjetër të pistë atë që se bënë dot me votën e kuksianëve.
Jam shumë i keqardhur për ngjarjen dhe jam mëse i qartë se në këtë situatë nuk ka vlerë asnjë lloj sqarimi. Prej disa kohësh unë kam një marrëdhënie intime me vajzën në fjalë por sigurisht nuk kam asnjë justifikim për atë çka ka ndodhur pavarësisht se i rënë në kurth”, shprehet Gjici.
Më tej ai e pranon se nuk është më i denjë për vijimin e detyrës.
“Nuk mund të jem më unë njeriu që punon në atë zyrë shteti pasi e kam tradhëtuar besimin e atyre mijëra njerëzve që besuan e punuan me mua për ta bërë Kukësin një qytet gjithnjë e më të mirë.
Ndjesë të gjithëve dhe mirënjohje gjithë jeten kujtdo më besoi dhe mbështeti. Ishte nderi i jetës time që u njollos nga një mendjelehtësi e pafalshme, ndaj sot ndjej detyrimin minimal të jap dorëheqjen! Zoti ju bekoftë të gjithëve!”, përfundon mesazhi i kryebashkiakut të Kukësit. /tesheshi.com/