Është përcjellë për në banesën e fundit trupi i pajetë i Kryepeshkopit Anastas Janullatos, i cili iku i gjallë nga Tirana në Athinë e kthye i pajetë, pas ditësh qëndrim në spital me shëndet të rënduar. Trupi i tij do të prehet në Kriptën e Katedrales ortodokse “Ngjallja e Krishtit”.
Në ceremoninë e Lamtumirës ndaj tij ishte dhe kryeministri grek Mitsotakis, i vendosur mes Ramës e Berishës, në një përafëri fizike të diktuar nga protokolli për shërbimet e fundit ndaj të ndjerit.
Nga Mitsotakis, ai u quajt “një themelues madhor dhe një pionier, një pararendës i jashtëzakonshëm i ortodoksisë në Shqipëri”. 
“Nuk është rastësi pra, theksoi kryeministri grek, “që sot e vajtojnë si grekët, ashtu edhe shqiptarët, por dhe njerëzit kudo në botë, pavarësisht fesë apo kombësisë”.
“Kryepeshkopi ishte gjithmonë një urë miqësie midis dy popujve dhe një hallkë komunikimi mes dy shteteve”, shtoi ai.
Nga ana tjetër, kryeministri Rama tha se “ai erdhi në Shqipëri si një prift nga Greqia, por largohet si
Anastasi i Shqipërisë”.
“Nuk kam për qëllim të bëjë as nekrologjinë dhe as teologjinë e këtij prelati të cilin për hirin e pamohueshëm të së vërtetës gjithë çfarë mban rruzulli me njerëz të nderuar të fesë, me intelektualë të angazhuar për paqen dhe përmes dialogut ndërfetar, në artizanë të komunikimit mes kulteve dhe kulturave dhe deri te çdo kryetar shteti dhe qeverie që e njohu, ja patën shumë zili Kishës Ortodokse Autoqefale të Shqipërisë”, tha Rama. /tesheshi.com/
