Mbyllja e një kapitulli erdhi dhe për legjendarin e Romës, kapitenin që bëri epokë te skuadra romane. Një fund i shtyrë muaj pas muaji, javë pas jave, ditë pas dite, që në sezonin e shkuar, por që trokiti gjithsesi.
Francesco Totti luajti dje minutat e fundit në “Olimpico” me fanellën e Romës. Në minutën e 54-t ai shkeli fushën e stadiumit olimpik të kryeqytetit italian për të fundit herë si një lojtar i Romës.
Një karrierë e nisur me debutimin më 28 mars të 1993-shit dhe e përfunduar më 28 maj të 2017-s!
“Faleminderit Roma! Faleminderit nëna e babai im, vëllai im, të afërmit e mi dhe miqtë e mi! Faleminderit gruaja ime dhe tre fëmijët e mi! Dua ta nis nga fundi, sepse nuk e di nëse do të jem në gjendje t’i lexoj këto rreshta. Eshtë e pamundur t’i përmbledh 28 vite në pak fjalë. Do doja ta bëja këtë me një këngë a poemë, por nuk mund ta shkruaj një të tillë…”
Kështu do t’i drejtohej Totti tifozerisë që kishte mbushur dje “Olimpico”-n veç për të, duke lexuar një letër emocionuese të përgatitur për këtë çast.
25 sezone të luajtura për Romën, 786 dalje në fushë, 619 vetëm në Serinë A, 307 gola në të gjitha aktivitetet…
Arrivederci capitano! /tesheshi.com/
