Partia Demokratike ka mbërritur në 10-ditëshin e protestës së saj në çadër, e cila ka sjellë ndryshime radikale të sjelljes politike të opozitës së saj.
E nisur si një protestë qytetare me kërkesën e vetme politike siç është qeveria tekknike për ta çuar vendin në zgjedhje, çadra solli një avancim, apo thënë më mirë një dizavancim të pozicioneve të Partisë Demokratike.
Kështu, në ditën e tretë të protestës PD mori vendimin final të bojkotit të Kuvendit, veprim që ka sjellë si pasojë direkte dështimin e ngritjes së komisioneve të Vettingut.
Në 10 ditë të protestës së saj, PD nuk ka marrë asnjë sinjal relevant mbështetjeje nga ndonjë kancelari e rëndësishme ndërkombëtare, por vetëm disa sinjale periferike të lobistëve të opozitës.
Madje reporteri i Parlamentit Europian, Knut Fleckenstein, shmangu në mënyrë të hapur çadrën dhe i kërkoi PD-së zyrtarisht të kthehet në Parlament.
Të njëjtën ftesë PD-së ja bënë edhe Kukan e Mogherini, nëpërmjet zëdhënëses Koçijançic.
Por PD sulmoi hapur Fleckensteinin nëpër rrjetet sociale duke thënë se ai ka ardhur në Shqipëri të takonte të dashurën, ndërsa Fahri Balliu, një botues pranë opozitës shpeshtoi sulmet ndaj ambasadores së BE-së në Tiranë, Romana Vlahutin.
Pas bojkotit, Lulzim Basha ka avancuar e ndryshuar sërish qëndrimin politik duke kërkuar ribërjen e 7 ligjeve të Reformës në Drejtësi, të cilat kanë hyrë në fuqi, por edhe kanë nisur zbatimin.
Pra, në një farë mënyrë protesta ka çuar në një hap prapa të qëndrimeve që vetë PD ka ndërmarrë siç ishte votimi ndaj Reformës.
Ndërkaq, çadra ka shërbyer edhe si një lloj “letre lakmuesi” të qëndrimeve të Partisë Demokratike për të shikuar sesi do të silleshin zërat e ndryshëm.
Patozi, Topalli, por edhe Majlinda Bregu, edhe pse me qëndrime të ndryshme kanë qenë kundër bojkotit të zgjedhjeve të 18 qershorit nga ana e PD-së, pasi Basha e thotë çdo ditë se nuk do të ketë zgjedhje në kushtet aktuale.
Në fakt, edhe një nga njerëzit e afërt të familjes Berisha, bashkëshorti i Argita Berishës, Jamarbër Malltezi kritikoi edhe formën por edhe përmbajtjen e protestës.
Ndërkaq, gazeta RD dy ditë më parë sulmoi fuqishëm zërat ndryshe duke i thurur lavede LSI-së dhe Ylli Manjanit, pasi sipas shkrimit janë më opozitarë si shumë të PD-së.
Pra në një farë mënyrë, po përvijohet një qëndrim në PD sikur do të largojë apo mënjanojë shumë figura të vjetra.
Tjetër pasojë e çadrës ka qenë edhe një qëndrim i ngurtë por ende i paqartë i Ilir Metës, megjithëse thirret përditë që t’i bashkëngjitet qëndrimit të PD-së.
Në ditët në vazhdim do të shikohen pasojat e kësaj lëvizjeje, pasi me largimin e Armando Prengës shumë veta besojnë se Edi Rama është më i varur nga Ilir Meta në Kuvend dhe nuk i ka numrat.
Sot mbështetës të çadrës kanë shkruar në rrjetet sociale se deputeti i LSI-së që ka dalë nga lista e Lezhës pas ikjes së Prengës mund të jetë kyç për kohëzgjatjen e protesës.
Ka edhe një zhvillim tjetër. Në çadër është goditur me grusht Kreshnik Spahiu. Sulmuesi njihej si përkrahës i PD-së, por Kreshniku tha se e ka gjuajtur me porosi të Ramës. Pra nga kronikë e zezë nisi të qarkullojë si “rozë” apo teori konspirative…/tesheshi.com/
