Nga Blendi Gashi
Mocioni i iniciuar nga NISMA për Kosovën për rrëzimin e qeverisë ka shkaktuar jo pak zemërim te LDK-ja e Isa Mustafës.
Zyrtarë të këtij subjekti, me të kuptuar se partia e Fatmir Limajt ka arritur të mbledhë nënshkrimet për mocionin dhe e ka proceduar atë në Kuvend, kanë ironizuar jo pak me kreun e NISMA-s, ku i kanë përmendur rastet e MTPT-së, ku është një prej të dyshuarve për korrupsion.
Por jo vetëm burrat e LDK-së janë përplasur rreth lakmisë për pushtet. Por edhe gratë e partive në fjalë kanë ndezur një “luftë” mes tyre, ku kanë akuzuar njëra-tjetrën për mashtrim të elektoratit.
Përplasja ka ndodhur konkretisht mes deputetes së NISMA-s Valdete Bajrami dhe Vlora Dumoshit, shefes së stafit të kabinetit të kryeministit Mustafa.
E gjitha ka nisur pas deklaratave të bëra nga deputetja Bajrami e cila ka akuzuar Mustafën se po tenton të fshihet pas marrëveshjes së Demarkacionit, edhe përkundër se as deputetet e partisë së tij nuk duan ta votojnë, derisa ia ka përmendur edhe 70 dosjet sa ka qenë kryetar i Prishtinës.
“Kot e keni, se ju e kishit mundësinë, por keni dështuar, dhe është koha që ju si ‘Akademik’ ta pranoni humbjen,” ka shkruar ajo.
Ndaj Bajramit ka reaguar ashpër Vlora Dumoshi e LDK-së, e cila është shefe e kabinetit të kryeministrit Mustafa, duke i quajtur deklaratat e deputetes së NISMA-s plot vrer.
“Çfarë mund të thuash për komentet plot vrer të Valdete Bajramit, e cila nga lakmia për të qenë në pushtet s’la kënd pa ofenduar, duke filluar prej autoriteteve nacionale, ndërkombëtare e fetare, dhe mbi të gjitha, duke fyer në vazhdimësi inteligjencën e qytetarëve të Kosovës. Mocioni i fundit me përmbajtje komike po promovohet ‘fuqishëm’ vetëm nga njerëz pa fije autoriteti e kredibiliteti dhe nga sharës profesionistë. … karvani ec përpara!”, ka shkruar Dumoshi.
Nuk ka vonuar shumë dhe deputetja Bajrami i është kundërpërgjigjur zyrtares së LDK-së, duke thënë se është dëshmuar se cila parti ka tradhtuar elektoratin për pushtet, duke i përmendur koalicionin e lidhur me PDK-në, mashtrimin për punësimin e 120 mijë qytetarëve dhe ikjen e mbi 100 mijë qytetarëve nga vendi.
“U dëshmua se kush e tradhtoi elektoratin e vet prej lakmisë për pushtet, duke u bërë bashkë me ata që i akuzonit për vrasjet e veprimtarëve të LDK-së, me ata të cilët sipas juve ishin kapësit e shtetit, e që partia juaj i bëri kryetar kuvendi e kryetar shteti, por ja që për të ardhë në pushtet lakmia juve ua mbylli sytë dhe mashtruat me ato premtime të cilat nuk i mbajtët. Është mirë të merresh edhe këto pak ditë që iu kanë mbetur me stafin që i ke aty, se karvani juaj do të ndalet shumë shpejt,” është reagimi i Bajramit.
Ndryshe, gjatë ditës së djeshme janë përplasur edhe burrat e këtyre përmes shkrimeve të bëra në Facebook, ku kanë hedhur akuza në mes tyre. /tesheshi.com/
