Arkeologët besojnë se balta ka ruajtur për më shumë se 2000 vjet trurin më të vjetër njerëzor të gjetur. Organi njerëzor u gjet para 7 vjetësh brenda kafkës së një koke të prerë diku nga Epoka e Hekurit, afër qytetit të Jorkut, në Britaninë e Madhe. Testet tregojnë se mbetjet i përkisnin shekullit të 6-të para Krishtit, domethënë rreth 2600 vjet më parë.
Arkeologët thonë se kafka u gjet e groposur në një terren moçalor, që – në mungesë të oksigjenit – ka shërbyer si konservues mjaft i mirë. Ishin pikërisht të tilla kushte që – sipas shkencëtarëve – bënë të mundur ruajtjen kaq të gjatë të organit, ndonëse shkaku ekzakt ende mbetet i panjohur.
Zbuluesit thonë se është tepër e pazakontë të gjesh inde njerëzore të kaq të moçme. Kafka u gjet e përmbysur në një gropë me baltë, por veç pasi iu bë pastrimi, u pa se brenda saj ishte truri. Rachel Cubitt tregon: “Po shihja nga vrimat e kafkës dhe, për çudi, vura re aty brenda diçka të verdhë si sfungjer. Kurrë s’kisha parë gjë të tillë!”
Një skuadër prej 34 ekspertësh po punon për studimin dhe ruajtjen sa më të mirë të trurit. Nga studimet paraprake besohet se truri i përket një njeriu të moshës 26-45 vjeçare. Ai është goditur fort pas qafe, dhe më pas i është prerë koka me një thikë të vogël e të mprehtë.
Një teori e grupit të studiuesve thotë se sekreti i ruajtjes ndoshta ka qenë varrosja e menjëhershme e tij. Me kalimin e shekujve, lëkura dhe mishi i kafkës janë tretur, por mungesa e oksigjenit brenda saj dhe moslëvizja mund të ketë konservuar mrekullisht trurin njerëzor. (BBC- titulli është redaksional)
