Ristartojnë pas disa vitesh ndërprerjeje, punimet për aksin e Kardhiqit, një zhvillim për turizmin veror shqiptar të jugut, pasi eliminon përfundimisht të lodhshmen e të sikletshmen Qafë të Muzinës, nga Gjirokastra për në Sarandë. Me rrugën e re të Kardhiqit, një vepër e ish-qeverisë Berisha, mundësohet Tiranë – Sarandë për 3 orë, duke përfshirë dhe baypass-in e Fierit.
“Kjo rrugë sjell një transformim të madh në lëvizshmërinë e përgjithshme dhe në funksion të turizmit. Nëse sot Gjirokastra dhe Saranda janë pranë, por sidoqoftë në një distancë dhe me një lëvizshmëri që nuk e inkurajon fluksin intensiv të lëvizjes së turistëve, nesër këto dy qytete do të jenë një. Traseja e rrugës së re dhe projekti i ri nuk janë asgjë më shumë sesa rikonceptimi me standarde të kohës së sotme, i shtegut rrugor të përdorur që në prehistori, nga ilirët, romakët, turqit, italianët dhe gjermanët. Për të shmangur Qafën e vështirë dhe tërësisht të amortizuar të Muzinës dhe për ta shkurtuar me një orë pothuajse lidhjen mes Tiranës dhe Sarandës. Kjo do të thotë se me përfundimin e këtij aksi dhe bypass-it të Fierit, ne do të kemi një lidhje mes kryeqytetit dhe Sarandës, që nuk do të marrë më shumë se 3 orë kohë”, deklaroi Rama në nisje të punimeve. /tesheshi.com/
