Nga Entela Canaj
Tashmë fëmijët e emigrantëve shqiptarë në Greqi, do të kenë më shumë të drejta se prindërit e tyre, kjo falë ligjit të ri që është miratuar së fundmi. Pavarësisht problemeve dhe krizës që po kalon, Greqia ka miratuar me shumicë votash projektligjin e marrjes së nënshtetësisë për fëmijët e brezit të dytë të emigrantëve shqiptarë, por dhe të kombësive të tjera.
Lajmi bëhet i ditur nga Kryetari i Federatës së Shoqatave Shqiptare në Greqi z.Etmond Guri në Athinë, ( i cili edhe në një intervistë të para pak ditëve dhënë përsheshi.com ka shpjeguar përmbajtjen dhe rëndësinë e këtij projektligji). Guri tha sot, se tashmë ky projektligj i shumëpërfolur, është kthyer në një ligj, dhe i bashkohet kuadrit ligjor të Republikës Demokratike të Greqisë, e aq më tepër Kodit të Emigracionit, pra të ligjit 4251/2014!
“Ky ligj, është vlerësuar nga të gjithë si një hap shumë i madh i cili përveçse i hap rrugën dhënies së nështetësisë fëmijëve të brezit të dytë, njëkohësisht jep mundësinë e ligjërimit edhe të shumë kategorive të tjera. Kryesisht një nga kategoritë që përfitojnë janë nënat/gratë të cilat do të përfitojnë direkt nga ky ligj. Gjithashtu janë dhe shumë kategori të tjera emigrantësh që do të përfitojnë,” thotë Guri, ndërsa shton se vlen të theksohet edhe fakti tjetër se tashmë, emigrantët e ligjshëm që humbasin ligjërimin (refuzimet/aproipsi) apo dhe shumë kategori të tjera të paligjshme, nuk do të penalizohen me deportim – apelasi.
Tashmë sipas procedurës ligji duhet të dekretohet nga Presidenti i Republikës së Greqisë, më pas do të publikohet në Fletoren Zyrtare, dhe nga ky moment ligji hyn në fuqi menjëherë. “Urojmë që administrata greke të ketë marrë të gjitha masat e nevojshme që ligji të gjej zbatim të plotë, e aq më tepër të shmangen radhët e gjata, apo vonesat në procesin e ligjërimit,” thotë kreu i Federatës së Shoqatave Shqiptare në Greqi, që në emër të kësaj shoqate përshëndet qeverinë e SYRIZA-s dhe e mirëpret këtë ligj. /tesheshi.com/
