I dërguari i posaçëm i Bashkimit Evropian për dialogun ndërmjet Serbisë dhe Kosovës, Miroslav Lajçak, ka thënë se gjatë takimit me kryenegociatorin e Kosovës dhe zëvendëskryeministrin Besnik Bislimi është rënë dakord për takimin e radhës të kryenegociatorëve në Bruksel, por nuk specifikohet se kur do të mbahet.
Lajçak u tha gazetarëve se data e takimit në Bruksel nuk mund të shpallet pa koordinim me të tjerët, pa dhënë më shumë detaje.
Ai ka shtuar se në takim është biseduar për hapjen e urës në Ibër dhe ka ritheksuar se ura duhet të hapet për qarkullim, por në bashkëpunim me partnerët ndërkombëtarë.
“Ne folëm se sa progres është bërë që nga takimi i kaluar. Diskutuam për çështjen e urës mbi Ibër dhe hapjen e saj për trafik. Qëndrimi i BE-së është i njohur, duhet hapur, por hapja duhet të jetë në bashkëpunim të ngushtë me partnerët ndërkombëtarë të Kosovës”, tha Lajçak.
Ai shtoi se në takimin me Bislimin është biseduar edhe për zhbllokimin e zbatimit të Marrëveshjes për rrugën drejt normalizimit të marrëdhënieve, për të cilën tha se është pjesë e vlefshme e rrugës evropiane të të dyja palëve.
Zbatimi i Marrëveshjes së Ohrit
“Marrëveshja e Ohrit në tërësi është ligjërisht e detyrueshme dhe ne jemi duke punuar në zbatimin e saj. Asnjë palë nuk është tërhequr nga kjo marrëveshje dhe ne kemi diskutuar me Kosovën dhe Serbinë se si ta përshpejtojmë zbatimin”, ka thënë Lajçak.
Megjithatë, ai vlerësoi se ka deklarata nga të dyja palët që nuk e ndihmojnë procesin e dialogut. Me rastin e bllokadave të paralajmëruara sot të vendkalimeve në Kosovë për shkak të mbylljes së institucioneve paralele në Serbi, Lajçak shprehu shpresën se nuk do të ketë bllokadë sepse, siç tha ai, ndikon negativisht në lirinë e lëvizjes dhe jetën e njerëzve.
Zëdhënësi i Komisionit Evropian, Peter Stano, më herët ka konfirmuar se Lajçak do të vizitojë Kosovën, por se aktualisht nuk po planifikon një vizitë në Beograd.
Në një konferencë për media të enjten në Bruksel, Stano vlerësoi se situata në Kosovë është mjaft e paqëndrueshme dhe u tha autoriteteve të Kosovës që të shmangin çdo veprim dhe hap që janë të njëanshëm, të pakoordinuar dhe mund të kontribuojnë në rritjen e tensioneve dhe përshkallëzimin shtesë të situatës. /tesheshi.com/
