Përfaqësuesi Special i BE-së për Dialogun Beograd-Prishtinë, Miroslav Lajcak shprehu pritshmërinë që takimi i parë midis presidentit serb Aleksandar Vuçiç dhe kryeministrit të Kosovës Albin Kurti të mund të ndodhte brenda disa javësh dhe se një marrëveshje mbi normalizimin e marrëdhënieve mund të arrihej brenda po muajsh, apo dhe disa javësh, nëse ekziston vullneti politik i udhëheqësit për ta bërë këtë.
“Mendoj se mund të presim takimin e parë shumë shpejt, pa vonesa të panevojshme,” i tha Lajcak Radios Evropa e Lirë (RFE), raporton, duke shtuar se të dy Kurti dhe Vuçiç i thanë se ishin të gatshëm të vinin në Bruksel dhe të vazhdonin dialogun.
Lajcak tha se ai kishte “kohë të mjaftueshme për një punë serioze” sepse Këshilli Evropian rinovoi mandatin e tij të premten e kaluar për 17 muaj, deri në fund të gushtit 2022, por ai gjithashtu shtoi se një marrëveshje mund të arrihej më herët.
“Teknikisht (arritja e një marrëveshjeje për normalizimin) është e realizueshme për disa muaj, megjithatë, unë nuk jam ai që e vendos atë. Shpejtësia e procesit vendoset nga të dy palët: Serbia dhe Kosova”, shtoi ai.
I pyetur se cilat çështje do të zgjidhen nga një marrëveshje gjithëpërfshirëse, ligjërisht e detyrueshme për normalizimin e marrëdhënieve, Lajcak tha se “e gjithë kjo u ra dakord vitin e kaluar midis presidentit Vuçiç dhe kryeministrit Hoti, me ndërmjetësimin e BE”.
“Të dy palët e dinin saktësisht se çfarë po negociohej, sa hapa po çojnë në një marrëveshje gjithëpërfshirëse. Tani duhet të dëgjojmë nga administrata e re në Kosovë deri në çfarë mase është identifikuar me atë marrëveshje ose me atë plan, me atë program, nëse ka ndonjë propozim të ri apo element të ri, për të cilin ata sigurisht kanë të drejtë. Në fakt, nuk është BE-ja ajo që vendos se cili do të jetë rezultati. Eshtë Beogradi dhe Prishtina që janë duke rënë dakord për këtë dhe ne jemi këtu për të ndihmuar,” tha Lajcak.
Lajcak tha se ai nuk e kishte ndryshuar qëndrimin e tij mbi idenë e shkëmbimit të territoreve, duke shtuar se “ndryshimi i kufijve mbi baza etnike nuk është një koncept i shekullit 21, nuk është një koncept mbi të cilin është ndërtuar BE”. /tesheshi.com/
