I dërguari i posaçëm i Bashkimit Evropian për dialogun ndërmjet Serbisë dhe Kosovës, Miroslav Lajçak, tha të enjten se pret që Serbia dhe Kosova të pranojnë planin evropian për zgjidhjen e çështjes së Kosovës në takimin në Bruksel të hënën, më 27 shkurt.
“Plani, të cilin besoj se do ta pranojmë të hënën, do të bëhet i detyrueshëm për të dyja palët. Nuk është një marrëveshje e përkohshme, pas saj do të vazhdojë procesi i normalizimit gjithëpërfshirës të marrëdhënieve, i cili duhet të përfundojë me nënshkrimin e një marrëveshjeje gjithëpërfshirëse para hyrjes së Serbisë dhe Kosovës në BE”, tha ai në një intervistë për Tanjug.
Ai theksoi se dokumenti do të jetë në dispozicion të publikut kur të pranohet nga të dyja palët.
I pyetur nëse takimi i planifikuar për 27 shkurt do të thotë se Serbia dhe Kosova kanë arritur një marrëveshje në lidhje me versionin përfundimtar të planit franko-gjerman, Lajçak tha se që nga shtatori janë zhvilluar bisedime me presidentin serb Aleksandar Vuçiç dhe kryeministrin e Kosovës Albin Kurti në lidhje me propozimin evropian.
Gatishmëria për të normalizuar marrëdhëniet e ndërsjellta
“Së fundmi presidenti Vuçiç në janar dhe kryeministri Kurti në shkurt thanë se e pranojnë atë propozim. Pra, ka ardhur koha që të organizohet një takim në Bruksel dhe presim që partnerët tanë ta pranojnë zyrtarisht dhe publikisht atë propozim dhe të diskutojnë për zbatimin e tij, që është qëllimi i takimit të hënën”, tha Lajçak.
I pyetur nëse takimi i 27 shkurtit në Bruksel është vendimtar në këtë kuptim, pra sipas parimit “merre ose lëre”, ai thotë se nuk do të diskutonte për formalitetet.
“Është e rëndësishme që të dyja palët ta pranojnë planin dhe zyrtarisht dhe publikisht të thonë se e pranojnë dhe pastaj të diskutojmë për të gjitha detajet e tjera, para së gjithash për përmbushjen e atij plani”, tha Lajçak.
Ai vlerësoi se takimi i pritshëm në Bruksel është shumë i rëndësishëm, sepse hapat e ardhshëm do të varen nga qëndrimet e palëve në negociata.
“Pranimi i propozimit tonë, i cili mbështetet nga 27 anëtarë të BE-së dhe SHBA, do të thotë se ata kanë vendosur të përmirësojnë marrëdhëniet e ndërsjella dhe të përshpejtojnë rrugën evropiane. Nëse njëra ose të dyja palët do ta refuzonin atë propozim, do të ishte një sinjal negativ se nuk janë të gatshme për normalizimin e marrëdhënieve të ndërsjellta dhe se nuk janë të gatshme të ecin më shpejt në rrugën evropiane, ndaj presim që plani të pranohet. Të gjithë e dinë se çfarë presim nga takimi i së hënës. Ne patëm bisedime me presidentin Vuçiç dhe kryeministrin Kurti gjatë Konferencës së Sigurisë në Mynih, kështu që të gjithë e dimë se ku jemi dhe çfarë presim”, theksoi Lajçak.
Është e qartë për të gjithë se nuk mund t’i thuhet “jo” BE-së dhe Amerikës
Ai shtoi se propozimi që do të jetë në tryezë të hënën në Bruksel ka mbështetjen e fortë të BE-së.
“Refuzimi i atij propozimi do të thotë refuzim i normalizimit të marrëdhënieve dhe refuzim i rrugës evropiane, ndaj kësaj do të reagonin SHBA-ja, komuniteti ndërkombëtar dhe BE-ja dhe nuk dua të hyj në atë se cilat do të ishin pasojat negative tani. Mendoj se është e qartë për të gjithë se nuk duhet t’i themi ‘jo’ BE-së dhe Amerikës, veçanërisht nëse mund të arrijmë stabilizimin, normalizimin e marrëdhënieve ndërmjet Serbisë dhe Kosovës, stabilizimin e atmosferës në Ballkan dhe një rrugë të përshpejtuar evropiane”, tha Lajçak.
Ai vlerësoi se refuzimi i propozimit do të dërgonte një sinjal negativ në rajon dhe do të hapte mundësi për rreziqe të reja të përshkallëzimit, siç ishin ato që ndodhën vitin e kaluar.
“Nuk mendoj se dikush e dëshiron këtë dhe ne kemi një propozim që hap një rrugë tjetër, e cila është rruga e normalizimit dhe stabilizimit”, theksoi Lajçak. /tesheshi.com/
