Përfaqësuesi special i Bashkimit Evropian për dialogun ndërmjet Kosovës dhe Serbisë, Miroslav Lajçak, ka thënë nga Prishtina se me kryeministrin Albin Kurti ka diskutuar për hapat e mëtejshëm në procesin e normalizimit të marrëdhënieve ndërmjet dy palëve.
Pas takimit në kryeqytetin kosovar, ai ka theksuar se hapat e mëtutjeshëm duhet të përcaktohen pas takimit të nivelit më të lartë që u mbajt në Bruksel më 2 maj dhe se ka një marrëveshje në këtë drejtim.
Ai tha se të premten do të vizitojë edhe Beogradin, ku për të njëjtën temë do të diskutojë me përfaqësuesit e Serbisë.
“Ne kemi një marrëveshje dhe kemi një aneks, ndaj duhet të jemi të qartë për hapat e parë, të dytë dhe të tretë. Ky ishte qëllimi i një diskutimi shumë intensiv por të rëndësishëm. Do të shkoj edhe në veri të Kosovës, ku do të takohem me liderët vendorë, në mënyrë që të kuptojmë situatën atje dhe shpresoj se do të kemi një zgjidhje politike që do të çojë në normalizimin e plotë të marrëdhënieve dhe zbatimin e marrëveshje”, ka theksuar Lajçak.
Ai ka bërë të ditur se të hënën në Bruksel do të takohet me kryenegociatorët e Kosovës dhe Serbisë, Besnik Bislimi dhe Petar Petkovicc.
“I fokusuar në normalizimin e plotë”
Duke iu përgjigjur pyetjeve të gazetarëve lidhur me situatën në veri të Kosovës, Lajçak ka theksuar se “mund të kemi normalizim apo konflikte”.
“Ne jemi patjetër të fokusuar në normalizimin e plotë”, për të shmangur çdo përshkallëzim apo konflikt, që nuk është në interesin e askujt.
Duke komentuar mosmarrëveshjen mes Kosovës dhe Serbisë lidhur me propozim-statutin e komunitetit të komunave me shumicë serbe në veri të Kosovës, Lajçak tha se puna e ndërmjetësit është të gjejë një zgjidhje të mesme dhe pikërisht këtë po përpiqet për të bërë.
I pyetur nëse modeli kroat për minoritetet që përmend Kurti mund të funksionojë në Kosovë, Lajçak tha se çdo gjë e bazuar në normat evropiane dhe në përputhje me modelet ekzistuese evropiane është e pranueshme për BE-në. /tesheshi.com/
