Përfaqësuesi Special i Bashkimit Evropian për Dialogun ndërmjet Serbisë dhe Kosovës, Miroslav Lajçak, e vlerësoi si “një bisedë të mirë” atë që ai pati me kryeministrin e Kosovës Avdullah Hoti.
“Një bisedë e mirë me kryeministrin Avdullah Hoti, në të cilën shkëmbyem mendime mbi gjendjen aktuale të dialogut të ndërmjetësuar nga BE,” shkroi Lajçak në Twitter.
Hoti më parë tha se kishte biseduar me Lajçak, duke thënë se Kosova mbetet e përkushtuar për dialog, i cili do të çojë në njohjen reciproke të Kosovës dhe Serbisë.
“Sapo kam pasur një diskutim thelbësor dhe të frytshëm me Lajçak, të cilin e falënderova për angazhimin e tij në dialog. Kosova mbetet e përkushtuar në procesin e dialogut, i cili duhet të rezultojë në një marrëveshje ligjërisht të detyrueshme që do të çojë në njohjen e ndërsjelltë,” shkroi Hoti në një postim në Tëitter.
Presidenti serb Aleksandar Vuçiç dhe Hoti nënshkruan një marrëveshje të quajtur “Normalizimi Ekonomik” në Uashington në fillim të Shtatorit, në prani të Presidentit të SHBA Donald Trump.
Marrëveshja e nënshkruar nga Vuçiç dhe Hoti në Shtëpinë e Bardhë nuk përfshin njohjen reciproke.
Nga të dy palët, në 16 pika, përfaqësuesit e Serbisë dhe Kosovës u angazhuan për normalizimin e marrëdhënieve ekonomike.
Në fillim të muajit të kaluar, një negociatë e re midis Kosovës dhe Serbisë filloi në Bruksel, nën kujdesin e Bashkimit Evropian. /tesheshi.com/
