Stabiliteti dhe zhvillimi i Ballkanit Perëndimor janë jetike për Evropën, dhe stabiliteti i qëndrueshëm kërkon një marrëveshje gjithëpërfshirëse dhe të qëndrueshme midis Serbisë dhe Kosovës, tha Ministria e Jashtme gjermane pas një takimi midis ministrit të Jashtëm Heik Maas dhe Përfaqësuesit Special të BE-së për Dialogun Kosovë-Serbi, Mirosllav Lajçak.
Ballkani Perëndimor është i lartë në axhendën e presidencës gjermane të Këshillit të BE-së, deklaron Ministria në Twitter.
Vlerësohet se Lajçak sjell impuls të ri në dialogun midis Serbisë dhe Kosovës nën kujdesin e BE-së, si dhe se ai vendos qëllime ambicioze.
“Ne dëshirojmë përparim të shpejtë, të dukshëm për njerëzit në rajon. E ardhmja e Ballkanit Perëndimor është në Evropë. Kjo është arsyeja pse BE-ja duhet të luajë një rol udhëheqës,” tha Ministria gjermane.
Ajo shton se stabiliteti i qëndrueshëm në rajon kërkon një marrëveshje gjithëpërfshirëse dhe të qëndrueshme ndërmjet Kosovës dhe Serbisë.
“Ky është një parakusht kryesor për realizimin e perspektivës evropiane të të dy vendeve.”
Në Berlin, Lajçak u takua dhe me Presidentin gjerman Frank Walter Steinmeier, si dhe me këshilltarin e çështjeve të jashtme të kancelares Angela Merkel, Jan Hecker.
“Ne diskutuam dialogun e ndërmjetësuar nga BE midis Serbisë dhe Kosovës, dhe rëndësinë e takimit të parë të nivelit të lartë, që do të mbahet në 12 korrik, pas samitit të Parisit,” tha Lajçak në Twitter.
Të Premten, Merkel dhe Macron do të organizojnë një video-samit kushtuar Ballkanit Perëndimor dhe dialogut midis Serbisë dhe Kosovës. /tesheshi.com/
