Përfaqësuesi i posaçëm i Bashkimit Evropian për dialogun ndërmjet Kosovës dhe Serbisë, Miroslav Lajçak, ka thënë se Marrëveshja e Brukselit është ratifikuar nga Parlamenti i Kosovës, “duke u bërë kështu një obligim juridik ndërkombëtar për Kosovën”.
“Ne e kuptojmë se kjo çështje është e ndjeshme për Qeverinë e Kosovës, por obligimet duhet të përmbushen”, tha Lajçak, duke iu përgjigjur pyetjes se pse komuniteti i komunave serbe ende nuk është formuar, transmeton agjencia Beta.
Siç tha ai, “qëndrimi i Bashkimit Evropian dhe i Shteteve të Bashkuara të Amerikës dhe partnerëve të tjerë ndërkombëtarë është se çdo vonesë e mëtejshme është e papranueshme”.
Ai tha se Bashkimi Evropian aktualisht është duke punuar në dy pista që dialogu ndërmjet Kosovës dhe Serbisë të ecë përpara.
“Së pari, prioriteti është që të dyja palët të bien dakord për propozimin e BE-së për normalizimin e marrëdhënieve”, tha Lajçak.
“Së dyti, ne vazhdojmë të punojmë paralelisht për të siguruar zbatimin e plotë dhe të menjëhershëm të të gjitha elementeve të asaj që është rënë dakord deri më tani në dialog, të cilat mbeten të vlefshme dhe detyruese për të dyja palët”, shtoi ai. /tesheshi.com/
