Bashkimi Europian ka shqyrtuar disa elementë të marrëveshjes përfundimtare në dialogun mes Kosovës dhe Serbisë gjatë vitit 2020, thënë kjo nga i dërguari i BE-së Miroslav Lajçak, në një intervistë për median serbe NOVA. Por sipas tij, gjithçka ndryshoi kur në pushtet erdhi Albin Kurti në Kosovë.
“Me ndryshimin e qeverisë në Prishtinë ndryshoi edhe qasja e Kosovës ndaj bisedimeve për një marrëveshje gjithëpërfshirëse”, u shpreh ai, duke e goditur rëndë të parin e qeverisjes kosovare me këtë deklarim pa “dorashka diplomatike”.
Lajçak tha se marrëveshja për normalizimin e marrëdhënieve është një pjesë e rëndësishme për të arritur tek zgjidhja përfundimtare.
Më thjeshtë, për Kosovën thotë se duhet të nisë me formimin e Asociacionit me draft-statutin europian. Ndërsa Serbia duhet të përmbushë detyrimet e saj të shumta paralelisht, duke filluar me njohjen e simboleve të Kosovës, dokumenteve dhe institucioneve.
Gjuhë diplomatike, Lajçak përdori vetëm kur u pyet për përshtypjet lidhur me sjelljen e Kurtit dhe Vuçiçit në dialog.
“Nuk kam dyshim se të dy duan integrimin në BE. Përndryshe, cila është alternativa? Konfliktet? Dhuna?”. /tesheshi.com/
